262 total views
Muling hinihikayat ng Caritas Manila ang mananampalataya na makiisa at suportahan ang taunang Alay Kapwa Telethon na isinagawa ng social arm ng Archdiocese of Manila katuwang ang himpilan ng Radyo Veritas kasabay ng pagsisimula ng Mahal na Araw.
Nakatakda ang Caritas Manila Alay Kapwa Telethon 2026 sa Lunes Santo ika-30 ng Marso, 2026 kung saan tampok ang iba’t-ibang mga inisyatibo at programa ng Caritas Manila para sa mga pinakanangangailangan sa lipunan.
“I-alay mo sa kapwa ang biyayang galing sa Kanya. Mga kapanalig, Alay Kapwa Telethon 2026 na sa Lunes Santo, Marso 30! Suportahan natin ang paglilikom-pondo ng Caritas Manila na nakalaan para sa mga biktima ng sakuna.” Bahagi ng paanyaya ng Caritas Manila.
Layunin ng Caritas Manila Alay Kapwa Telethon na makalikom ng pondong ilalaan sa mga pro-poor program ng Simbahan partikular na sa pagtugon sa pangangailangan at rehabilitasyon ng mga nasalanta ng iba’t-ibang kalamidad at sakuna sa bansa.
Live na mapapakinggan ang Caritas Manila Alay Kapwa Telethon 2026 mula ala-siete ng umaga hanggang ala-sais ng gabi sa Radyo Veritas DZRV 846AM at matutunghayan via livestream sa DZRV846 at Caritas Manila Facebook page, Veritas PH sa YouTube channel, at sa Veritas TV Sky Cable Channel 211.
Ilan sa mga programa ng social arm ng Archdiocese of Manila ang Caritas Damayan, Feeding Program, Youth Servant Leadership and Education Program (YSLEP), at ilan pang mga programa na naglalayong mai-angat ang buhay ng mga pinakamahihirap sa lipunan.
