191,849 total reads
Mga Kapanalig, maaaring magkaroon ng hanggang 105 araw na paid paternity leave ang mga tatay kapag maging batas ang House Bill No. 9891 o Paternity and Parental Leave Act (o PAPA Leave Act) na inihain ni Akbayan Party-list Representative Chel Diokno.
Ayon kay Diokno, ang PAPA Leave Act ay makatutulong sa pagsusulong ng gender equality, pagpapabuti ng kapakanan ng mga bata at pamilya, at pagpapalakas ng partisipasyon ng mga babae sa labor force. Idinagdag pa niya na hindi lamang responsabilidad ng kababaihan ang childcare, kundi isang pinagsasaluhang tungkulin ng mga magulang na dapat aktibong suportahan ng estado.
Sa ilalim ng panukala, magkakaroon ng 90 tuloy-tuloy na araw ng paid paternity leave para sa mga mister na ang misis ay nanganak, habang 60 araw naman para sa mga mister na ang misis ay nakunan o sumailalim sa emergency termination of pregnancy. Magkakaroon din ng karagdagang 15 araw na paid parental leave na maaaring gamitin ni mister sa loob ng isang taon mula sa panganganak, nang tuluy-tuloy o hati-hati, kaya’t maaaring umabot sa kabuuang 105 araw ang kanyang leave. Ipinagbabawal din ng panukala ang dismissal, demotion, o anumang uri ng diskriminasyon laban sa mga empleyadong tatay na gagamit ng benepisyong ito.
Hindi lamang mga ikinasal na ama ang saklaw ng panukalang batas. Kasama ring makikinabang ang mga tatay na hindi pa ikinakasal at iba pang alternative caregivers na may mahalagang papel sa pag-aalaga ng mga bagong silang na sanggol at maliliit na bata.
Malaki ang kaibahan ng panukalang PAPA Leave Act sa kasalukuyang batas. Sa ilalim ng Paternity Leave Act of 1996, pitong araw lamang ng paid leave ang maaaring makuha ng isang married male employee para sa unang apat na panganganak ng kanyang asawa. Maaari itong umabot sa 14 na araw kung ililipat ng ina ang pitong araw mula sa kanyang maternity leave sa ilalim ng Expanded Maternity Leave Law.
Kung maisasabatas ang PAPA Leave Act, maituturing itong tagumpay para sa buong pamilyang Pilipino. Ayon sa mga pag-aaral, nakatutulong ang paternity leave sa mas mabuting paglaki ng bata at mas matatag na pagsasama ng mag-asawa. Higit sa lahat, isinusulong nito ang gender equality. Kapag mas aktibong nakikibahagi ang mga tatay sa pag-aalaga ng anak, nababawasan ang pananaw na ang pag-aalaga ng mga bata ay trabaho lamang ng mga babae. Kung may paid leave ang mga tatay, nagkakaroon ng mas malaking pagkakataon ang mga nanay na makabalik sa trabaho at maipagpatuloy ang kanilang karera.
Kinikilala na sa ibang mga bansa ang kahalagahan ng paternity leave. Sa Lithuania, halimbawa, may 30 araw na paid paternity leave ang mga tatay bukod pa sa hanggang 36 na buwang shared parental leave. Sa Japan naman, maaaring umabot sa isang taon ang paid parental leave na eksklusibo para sa mga tatay. Ipinakikita ng mga bansang ito na ang presensya ng ama sa pagpapalaki ng anak ay isang mahalagang pamumuhunan sa kapakanan ng pamilya at lipunan.
Ipinapaalala ng Simbahan na ang pamilya ay sagrado: dito tunay na naipapanganak at napangangalagaan ang buhay. Ang mga batas na nagbibigay ng sapat na panahon sa mga magulang upang gampanan ang kanilang tungkulin ay nagtataguyod ng dignidad ng tao at nagpapatatag sa pamilya.
Mga Kapanalig, ang pag-aalaga sa isang bata ay hindi lamang responsabilidad ng nanay; ito ay tungkulin na dapat pinaghahatian ng parehong magulang. Ayon sa Mga Awit 127:3, “ang mga anak ay pagpapala at gantimpalang mula sa Panginoon.” Kaya naman, makatarungan na bigyan din ang mga tatay at ang mga tumatayong tatay ng sapat na panahon upang makasama ang kanilang mag-ina at makatulong sa pag-aaruga sa kanilang anak.
Sumainyo ang katotohanan.
