340 total views
Hinikayat ng kanyang Kabunyian Manila Archbishop Luis Antonio Cardinal Tagle ang mananampalataya na magpa-abot ng tulong sa pamamagitan ng kani-kanilang parokya para sa mga biktima ng bagyong Mathew sa Haiti.
“Mga minamahal na Kapanalig, mga kaibigan, mga kapatid sa panginoong Hesukristo, alam ko po na nabalitaan na ninyo ang paghagupit ng bagyong Mathew sa isang napakahirap na bansang Haiti. Tayo po habang nakikipag-usap sa inyo ay nakabalita na walong daang tao na ang naitalang namatay at sana naman ay hindi mangyari pero ang banta ng cholera ay nariyan,” panawagan ni Cardinal Tagle.
Ayon kay Cardinal Tagle, nakalulungkot na umaabot na sa mahigit 1,000-katao ang namatay dahil sa bagyo at hanggang sa kasalukuyan ay hindi pa nakababangon ang Haiti mula sa pinsala ng lindol noong 2010.
“Ang Haiti po ay bukod sa pagiging isa sa mahirap na bansa ay hindi pa po nakakabangon sa lindol na naganap noong 2010 na mahigit 2 daang libong tao ang namatay. Kaya po nanawagan tayo sa ating mga Kapanalig, mga kaibigan sa Pilipinas, una sa lahat isa-isip po natin sila,”apela ng Pangulo ng Caritas Internationalis sa pamamagitan ng Radio Veritas.
Iginiit ng Kardinal na kailangan ng Haiti ang pinansiyal na tulong lalo na mahirap ang kalagayan at pamumuhay sa nasabing bansa.
Ipinaalala ni Cardinal Tagle na tulad ng Pilipinas na nakararanas din ng mga bagyo at kalamidad ay nararapat lamang na tayo ang unang tumulong at magpadama ng awa at habag ng Diyos sa mga taga-Haiti.
Inihayag ng Kardinal na mayroong isinasaayos na pinansiyal na tulong na ipadadala ang mga parokya at organisasyon ng Archdiocese of Manila sa Haiti.
Sinabi ni Cardinal Tagle sa Radio Veritas na magsasagawa ng second collection sa mga parishes ng Archdiocese of Manila sa lahat ng misa sa hapon ng October 15(Sabado) at lahat ng misa sa October 16(Sunday) para sa mga biktima ng bagyo sa Haiti.
“Tayo rin po nakaranas ng bagyong Yolanda, sana tayo ang mga unang nakakaramdam ng pakikiisa sa kanila. Pero hindi sapat ang isipin sila, ipanalangin po natin sila at sa mga darating na linggo. Palagay ko sa ibat- ibang mga parokya at diyosesis at organization ay mayroon tayong magiging pagkilos upang makakalap ng maitutulong sa mga kapatid natin sa Haiti. Kaya po kumakatok kami sa inyo sa taong ito ng habag at awa ng Diyos, atin pong isagawa ang habag na ito,” mensahe ni Cardinal Tagle sa mamamayang Pilipino.
Mula sa datus ng gobyerno ng Haiti, umaabot sa 800 katao ang namatay at mahigit sa 60 libong tahanan ang nawasak sa pananalasa ni typhoon Mathew.
