478 total views
Magpapatuloy ang Archdiocese of Jaro sa lalawigan ng Iloilo na tulungan ang mga mahihirap sa kabila ng pagpapatupad ng mahigpit na quarantine measure.
Ito ang tiniyak ni Msgr. Meliton Oso, Social Action Director ng Arkidiyosesis matapos makatanggap ng tulong mula sa Caritas Manila para sa may 2,000 mahihirap na pamilya sa lalawigan ng Iloilo at Guimaras island.
Aminado si Msgr. Oso na malaking tulong ang proyekto ng Caritas Manila katuwang ang pribadong kumpanya na Accenture Philippines upang maka-agapay sa mga mahihirap sa gitna ng suliranin sa pandemya.
“Lahat lahat po ng binigay sa amin ay mga 2000 [pieces] at malaking tulong po ito sa mga mahihirap sa Archdiocese of Jaro compose of the province of Guimaras and the province of Iloilo. We are very thankful for Caritas Manila for extending to us this kindness.”pahayag ni Msgr. Oso sa panayam ng programang Caritas in Action.
Maliban sa paghahatid ng mga groceries sa mga mahihirap ay nagpapatuloy din ang Caritas kindness program ng Arkidiyosesis.
Ang Caritas kindness station ay tulad din ng pagsasagawa ng community pantry sa paraan na ayon sa katuruan ng Simbahang Katolika.
“Talagang ganyan ang sitwasyon ng mga mahihirap at nagugutom kaya binibigay na namin ng maaga yun mga ticket, uwi muna kayo punta na lang kayo pagbukas namin at ina-identify namin barangay per barangay para hindi palaging suki ang dumadating” dagdag pa ng Director ng Social Action Center ng Archdiocese of Jaro.
Naniniwala si Msgr. Oso na ang pagkilos ng Simbahan para sa mga mahihirap ay pagpapamalas lamang na kahit sila mismo ay nakakaranas din ng mga suliranin dulot ng pandemya ay hindi nito nakakalimutan ang mga nangangailangan.
“Ginagawa natin yan kahit tayo ay naghihikahos, at magiging maganda yun solidarity natin, ang pagpapakita, ang pagsasabuhay natin ng Caritas. Itong charity kahit na tayo nangangailangan we continue to extend compassion to our brothers and sister who need more.”
28 Diyosesis sa Pilipinas ang naging katuwang ng Caritas Manila upang mamahagi ng mga gift certificates sa mga tinuturing na “ultra poor families” o yun kumikita lamang ng mas mababa pa sa 10 libong piso kada buwan.
