Makikiisa ang Archdiocese of Manila sa isasagawang People’s March and Prayer Against Charter Change sa May 22, 2024.
Sa liham sirkular ni Manila Archdiocesan Chancellor Fr. Isidro Marinay, hinimok nito ang nasasakupan na makiisa sa pagtitipon sa harapan ng tanggapan ng Senado sa Pasay City mula alas tres hanggang alas singko ng hapon.
Gayundin ang pagpapatunog ng kampana ng mga simbahan tuwing alas kuwatro ng hapon para sa natatanging intensyon.
“Our prayers in the Our Mother of Perpetual Help Novena will be offered for our country and leaders,” bahagi ng mensahe ni Fr. Marinay.
Ang pagkilos ay inisyatibo ng social arm ng Catholic Bishops’ Conference of the Philippines na Caritas Philippines na kasalukuyang pinamumunuan ni Kidapawan Bishop Jose Colin Bagaforo.
Tiniyak ng social arm na paigtingin ang information drive sa mamamayan hinggil sa masamang idudulot sa pagpapalit ng konstitusyon.
“In this light, the Episcopal Commission on Social Action – Justice and Peace/Caritas Philippines and the Social Action Network, which is tasked to address this issue, would like to continue strengthening our anti-charter change campaign to ensure that our lay faithful are correctly informed and educated about the issues surrounding our Constitution,” ayon kay Bishop Bagaforo.
Inaasahan ang pakikibahagi ng humigit kumulang sa tatlong libong katao mula sa iba’t ibang mga parokya, catholic insitutions kabilang na ang mga paaralan sa Metro Manila at karatig lalawigan.
Hinimok din ng mga obispo ang mga parokya na hindi makadadalo sa prayer rally sa senado na magsagawa ng kaparehong gawain sa mga parokya sa parehong oras.
Patuloy ang paninindigan ng CBCP laban sa charter change at iginiit na hindi napapanahong palitan ang kasalukuyang 1987 Constitution sa halip ay hinimok ang pamahalaan na gumawa ng mga polisyang makatutugon sa pangunahing suliranin na kinakaharap ng bansa kabilang na ang kahirapan, kagutuman, at kawalang sapat na oportunidad sa mga Pilipino lalo na ang mga magsasaka at manggagawa.
