16,873 total reads
Pinaalalahanan ni Radyo Veritas President, Fr. Roy Bellen, ang mananampalataya sa kahalagahan ng pagsasabuhay ng katotohanan na may kalakip na panalangin.
Ito ang mensahe ng pari sa nalalapit na pagdiriwang ng kapistahan ng Our Lady of Veritas sa May 16.
Ayon kay Fr. Bellen, ang pagdiriwang ay paalala sa misyon ng Simbahan na ipahayag ang Mabuting Balita kasama ang paggabay ng Mahal na Birheng Maria tungo sa landas ng katotohanan sa kanyang Anak na si Hesukristo.
“Ito po’y paalala po sa atin na kasama ang Mahal na Ina sa misyon po na magpahayag ng mabuting balita,” ayon kay Fr. Bellen.
Ipinaliwanag ng pari na mahalaga ang sama-samang pagkilos upang maprotektahan at maipalaganap ang katotohanan lalo na sa gitna ng iba’t ibang hamon sa lipunan, ngunit iginiit ng pari na dapat kaakibat nito ang pananalangin.
“Totoo po, tayong mga Pilipino, tayong mga tao, kailangan pong kumilos para ang katotohanan maprotektahan at maipahayag, pero hindi ito maaaring maihiwalay sa panalangin,” ani ni Fr. Bellen.
Binigyang-diin din nito na hindi sapat ang pagkilos lamang kung wala ang paggabay at biyaya ng Diyos.
Kaugnay ng pagdiriwang, dadalhin ang imahe ng Our Lady of Veritas sa National Shrine of Mary Queen of Peace o EDSA Shrine bilang paggunita rin sa makasaysayang papel ng Radio Veritas noong People Power Revolution.
Umaasa naman ang pari na magsilbing inspirasyon ang kapistahan upang higit na mapatatag ang paninindigan ng mamamayan para sa katotohanan at pananampalataya.
“Nawa ang pagdiriwang na ito ay magpaalala ng kahalagahan po ng ating pakikipaglaban para po sa katotohanan, pero palaging may kasamang panalangin at basbas ng ating Panginoon,” saad ni Fr. Bellen.
Pangungunahan ni Fr. Bellen ang fiesta mass ng Our Lady of Veritas sa alas 12 ng tanghali sa EDSA Shrine na mapakikinggan sa himpilan, mapapanood sa lahat ng digital streaming platforms at sa Veritas TV sa Sky Cable 211 at Veritas TV Cebu 47.1.
