15,973 total views
Mariing tinutulan ng Ugnayan ng Mamamayan Laban sa Pagmimina at Kumbersyong Agraryo (UMALPAS KA – Bicol) ang planong open-pit mining ng Golden River Mining Corporation sa mga barangay ng Tugos, Tawig, at Casalugan sa Paracale, Camarines Norte.
Ayon sa grupo, hindi ito tunay na kaunlaran kundi isang mapaminsalang operasyon na magdudulot ng malawakang pinsala sa kalikasan, kabuhayan, at komunidad.
“Hindi ito maituturing na tunay na kaunlaran para sa mamamayan, kundi isang malawakang operasyon na sisira ng kalikasan, pangangamkan ng lupa, pag-agaw sa kabuhayan, pandarambong ng natural at mineral resources at paglugmok sa kahirapan ng mga mamamayang apektado at komunidad na matagal nang nakikipaglaban para sa kanilang lupa, karagatan, at kinabukasan,” pahayag ng UMALPAS KA-Bicol.
Target hukayin ng proyekto ang mahigit 321 ektaryang lupain at mag-extract ng tinatayang 780,000 metriko tonelada ng ore kada taon sa loob ng pitong taon.
Babala ng grupo, ang open-pit mining ay magreresulta sa pagkasira ng kabundukan, watershed, at sakahan na kritikal sa suplay ng tubig at kabuhayan ng mga residente.
Iginiit din ng UMALPAS KA – Bicol na mas lalala ang panganib ng pagbaha, landslide, at mga sakit dulot ng polusyon at kontaminasyon ng kapaligiran sa gitna ng krisis sa klima.
“Sa panahon ng lumalalang climate crisis, lalong mapanganib ang malawakang pagkakalbo ng lupa at kabundukan dahil pinapataas nito ang posibilidad ng pagbaha at landslide tuwing may malalakas na pag-ulan at bagyo,” ayon sa grupo.
Nananawagan ang grupo sa lokal at pamahalaang panlalawigan na tuluyang isantabi ang proyekto at itaguyod ang pangangalaga ng kalikasan at karapatan ng mamamayan.
Iginiit pa ng UMALPAS KA-Bicol, ang tunay na kaunlaran ay nakasalalay sa pangangalaga sa likas na yaman at hindi sa mapaminsalang pagmimina para sa tubo ng iilan.
“Pakinggan ang tinig ng mamamayan ng Paracale at buong Camarines Norte. Ang lupa, tubig, kagubatan, at likas na yaman ay hindi simpleng negosyo lamang. Ito ay buhay, kabuhayan, at kinabukasan ng sambayanan,” giit ng grupo.
Nauna nang nagpahayag ng paninindigan si Daet Bishop Herman Abcede, at binigyang-diin na hindi maaaring manahimik o manatiling walang paninindigan ang Simbahan at ang mamamayan sa gitna ng seryosong banta sa kapaligiran at buhay.
