Tiniyak ni Manila Archbishop Jose Cardinal Advincula sa mga biktima ng sakuna na kasama nila ang simbahan sa anumang pagsubok na kaharapin.
Pangako ito ni Cardinal Advincula, na siya ring Chairman ng Caritas Manila sa pamamahagi ng tulong ng Social Arm ng Archdiocese of Manila sa mga nasunugang residente ng Baranggay 655 Intramuros Manila katuwang ang San Agustin Church – Our Lady of Immaculate Conception Cathedral at One Cooperative Bank.
“Ang Diyos ay nagpapakita ng Kanyang pagmamahal sa inyo sa pamamagitan ng inyong mga kapatid, ng mga ibang tao na nagtutulong sa inyo. Ngayon ang nagtutulong sa inyo ay ang mga kapatid natin na sa parokya sa kapighatian. Kaya narito ang Caritas Manila bilang isang organisasyon ng simbahan na ang kanyang talagang ginagawa ay ang paghatid ng tulong, pagpapakita ng pagmamahal ng Diyos sa mga tao,” ayon sa mensahe ni Cardinal Advincula.
Tiniyak naman ni Caritas Manila Executive Director Father Anton CT Pascual na nakahanda ang social arm anumang oras na tugunan ang pangangailangan ng mga Pilipinong malalagay sa panganib at pangangailangan ang pamumuhay.
Sa ulat, 600 na pamilya ang nawalan ng tirahan sa nangyaring sunog.
“Dito sa Barangay 655 sa Intramuros, halos 600 families ang nasunugan dito. May namatay pa. Kaya narito ang Caritas Manila – Caritas Damayan. Kasama natin ang San Agustin at ang Archdiocese of Manila para mabigyan ng relief at rehab ang mga kawawang kababayan natin na nasunugan dito noong nakaraang linggo. Nawa yung ating mga pagkain, mga gamot na binigay sa kanila ay makatulong ng sumandali. At ipagdasal po natin ang mga nasunugan. Sabi nga eh, manakawan ka na, huwag ka lang masunugan.” ayon naman sa panayam ng Radyo Veritas kay Fr.Pascual.
Sa tala ng Caritas Manila, umabot sa 200 pamilyang nasunugan ang nabigyan ng tulong tulad ng pagkain, jerry cans at iba pang pangunahing pangangailangan.
