12,156 total reads
Nanawagan ang Caritas Philippines sa pamahalaan ng pananagutan o accountability sa ginagawang pangungutang upang tugunan ang kinakaharap na krisis ng bansa.
Ginawa ni Caritas Philippines President San Carlos Bishop Gerardo Alminaza ang panawagan sa pagdaraos ng national conference ng Association of Catholic Universities in the Philippines (ACUP) sa Camarines Sur.
Ayon sa obispo, mahalagang magamit ang inutang na pondo sa kapakanan ng mamamayan bagama’t may mga pagkakataong kinakailangang umutang ang mga bansa dahil sa mga krisis tulad ng pandemya, kalamidad, at pandaigdigang suliraning pang-ekonomiya.
“Countries sometimes borrow because of crises they cannot control: pandemics, climate disasters, global economic shocks, and rising interest rates,” ayon sa mensahe ni Bishop Alminaza.
Nauunawaan ni Bishop Alminaza na ang pangungutang ng Pilipinas ay maaring makatulong para mapanatili ang serbisyo publiko sa panahon ng krisis.
Gayunman, kawawa ang mga mamamayan sa pagbabayad ng inutang na pondo ng pamahalaan na napunta lamang sa corruption.
Iginiit ng Obispo na hindi dapat isantabi ng pamahalaan ang accountability dahil direktang apektado ang buhay ng mga mamamayan sa pagbabayad ng utang na hindi nila napakinabangan.
“Borrowing can help sustain essential services during difficult times. But the responsibility for repaying those debts eventually falls on the nation. And in the end it is ordinary citizens who carry that burden. This is why accountability matters so much,” bahagi pa ng mensahe ni Bishop Alminaza.
Dagdag pa ni Bishop Alminaza, ang pampublikong utang ay hindi lamang simpleng usapin ng mga numero, kundi isang pangako na ginawa sa ngalan ng sambayanan dahil nararapat na ang mga pondong hiniram ay gamitin para sa kabutihang ng lahat at hindi sa kapakinabangan ng iilang opisyal ng gobyerno.
Sa datos ng Bureau of Treasury, umaabot na sa 18.13-Trillion Pesos ang utang ng Pilipinas noong Enero 2026.
