9,638 total reads
Hinimok ni Tarlac Bishop Roberto Mallari ang mga Pilipino na maging mahinahon at patatagin ang pananampalataya sa pagharap sa mga suliranin sa ekonomiya.
Ito’y sa malaking epekto ng big-time oil price hike, pagtaas sa presyo ng mga pangunahing bilihin, pagtaas ng pamasahe at serbisyo na resulta ng digmaan sa Middle East.
Ayon kay Bishop Mallari, sa pamamagitan ng pananampalataya ay mapapalakas ang loob ng mga Pilipino sa pagharap ng mga suliranin at makabangon sa pagkalugmok.
“Panalangin para sa Kahinahunan at Lakas ng Loob ng mga Pilipino:
Mahal na Diyos, sa gitna po ng kaguluhan at krisis dulot ng digmaan, kami po ay lumalapit sa Iyo na may bukas na puso. Bigyan po Ninyo kami ng kapayapaan, lakas ng loob, at kahinahunan upang harapin ang mga hamong ito. Gabayan po Ninyo ang aming mga pinuno upang makagawa sila ng mga desisyong makakapagpaunlad at makapagbibigay-lunas sa aming bayan. Pawiin po Ninyo ang takot at pagdududa sa aming mga puso, at palakasin ang aming pananampalataya na sa tulong Ninyo ay malalampasan namin ang pandemyang ito at ang mga epekto ng digmaan. Amen,” ayon sa panalangin na pinadala sa Radyo Veritas ni Bishop Mallari.
Ayon sa Obispo, mahalaga rin ang pagkakaisa sa puso ng bawat Pilipino upang malutas ng sama-sama ang problemang kinakaharap ng bansa.
“Mga minamahal kong kababayan, sa panahon ng krisis, higit nating kailangan ang pagkakaisa at pagkakaroon ng pag-asa. Hindi madali ang mga pagsubok na dulot ng digmaan — mula sa pagtaas ng presyo ng mga bilihin hanggang sa kawalan ng katiyakan sa ating pang-araw-araw na buhay. Ngunit huwag tayong mawalan ng pag-asa. Manalig tayo sa Diyos, magtulungan tayo bilang isang bayan, at patuloy na magpakatatag. Sama-sama nating haharapin ang mga hamon at manalig na sa kabila nito ay may bukang-liwayway na naghihintay sa atin,” bahagi pa ng mensahe ni Bishop Mallari.
Una ng inaprubahan ng Land Transportation Franchising and Regulatory Board (LTFRB) ang pisong taas presyo sa pamasahe sa mga traditional jeepneys.
