56,407 total reads
Naniniwala ang Quezon City Disaster Risk Reduction and Management Office nakatulong ang mga flood mitigation projects ng Quezon City sa pagbawas ng malalang epekto ng malakas na pag-ulan dulot ng Habagat.
Sa panayam sa programang Veritas Pilipinas, sinabi ni QCDRRMO Spokesperson Peachy de Leon na bagama’t maraming lugar ang binaha, subsided na ang lahat ng naiulat na pagbaha sa mga kalsada at lansangan sa lungsod bagamat marami pa ring residente ang nananatili sa evacuation centers.
Ayon kay De Leon, umabot sa 201.7 millimeters ang naitalang ulan sa Science Garden mula alas-9 ng umaga hanggang alas-2 ng hapon, o sa loob lamang ng limang oras kahapon.
Pagbabahagi ni De Leon, kabilang sa mga hakbang ng lungsod ang pagsasagawa ng mga detention basin, retention pond, flood interceptors, stormwater storage system, dredging at pumping stations.
“Kahit naman po mayroon tayong mga flood mitigation projects, hindi naman po ito totally mawawala ang pagbaha. Somehow po mababawasan po ang severity and frequency po ng pagbaha sa mga areas na vulnerable po na communities. At patuloy na rin naman po na ginagawa ng buong QC government ang mga flood mitigation projects para po makatulong at maibsan ang pagtaas ng tubig baha.” Bahagi ng pahayag ni De Leon sa Radyo Veritas.
Inihayag din ni De Leon ang isinasagawang ongoing na detention basin sa G. Araneta Avenue na maaaring mag-imbak ng hanggang 2,000 cubic meters ng tubig-baha bago ito unti-unting ilabas sa mga waterways kapag humupa na ang ulan.
Patuloy din aniya ang “Tanggal-Bara, Iwas-Baha” program ng Quezon City, kabilang ang clearing, dredging at declogging ng mga waterways upang mapanatiling maayos ang daloy ng tubig.
Sa bahagi ng Simbahan, ang paghahanda at pangangalaga sa mga komunidad na nasa panganib ay bahagi ng pananagutan sa buhay at kabutihang panlahat kung saan higit sa imprastraktura, mahalaga rin ang pagtutulungan ng pamahalaan at mamamayan upang maprotektahan ang bawat buhay, lalo na ang mga pamilyang higit na bulnerable sa panahon ng kalamidad.
