138,025 total views
Mga Kapanalig, nagtapos noong isang linggo ang halos dalawang linggong United Nations Climate Change Conference o Conference of Parties na mas kilala bilang COP28. Ang pandaigdigang pagtitipon na ito ay ginanap sa Dubai, United Arab of Emirates, at dinaluhan ng libu-libong kinatawan ng mga bansa, eksperto, siyentipiko, at tagapagtanggol ng kalikasan. Layunin ng COP28 na i-assess ang kasalukuyang kalagayan ng ating planeta at ang mga hakbang na ginagawa ng iba’t ibang bansa at sektor upang protektahan ito. Hangad din ng pagtitipong ito na paigtingin ang sama-sama nating pagkilos upang isalba ang naghihingalo nating mundo.
Isa sa mga mainit na pinag-usapan sa pagtitipon ang isyu ng patuloy na paglikha at pagkonsumo natin sa fossil fuels bilang pangunahing pinagkukunan ng enerhiya. Ang fossil fuels gaya ng petrolyo, gas, at coal ang pinakamaruming pinagkukunan natin ng enerhiya dahil sa greenhouse gas emissions mula sa mga ito. Ang pagdami ng greenhouse gases sa ating himpapawid ang nagdudulot ng matinding pag-init ng ating planeta na nauuwi sa mabilis at pagbabago sa klima o climate change. Sa madaling salita, isa ang fossil fuels sa mga pangunahing dahilan kung bakit nakararanas tayo ng malalakas na bagyo at matinding tagtuyot.
Kaya naman, isinusulong ng maraming advocates ang paglipat natin sa mga renewable sources of energy katulad ng solar, wind, at hydro. “End fossil fuels!” Iyan ang naging panawagan nila, lalo na ang mga miyembro ng Alliance of Small Island States (o AOSIS), sa COP28,. Ang mga bansang miyembro ng AOSIS ay nahaharap sa posibleng paglubog kung patuloy na tataas ang tubig sa mga karagatan dahil nilulusaw ng climate change ang tinatawag na polar ice caps. Hindi miyembro ng AOSIS ang Pilipinas, pero tayo naman ang itinuturing na pinakalantad sa mga banta ng krisis sa klima.
Sa pagtatapos ng COP28 at sa unang pagkakataon, napagkasunduang kikilos papalayo ang mga bansa sa paglikha at pagkonsumo ng fossil fuels. “[We will be] transitioning away from fossil fuels in energy systems, in a just, orderly and equitable manner… so as to achieve net zero by 2050,” pahayag ng mga dumalo. Para kay COP28 President Sultan Al Jaber, maituturing na “transformational change” ang naging kasunduan.
Ngunit para sa chief negotiator ng bansang Samoa na si Anne Rasmussen, ang naging kasunduan sa COP28 ay “incremental advancement” o maliit na pagbabago lamang. Ang kailangan natin ay “exponential step” o malaking hakbang para tugunan ang climate change. Dismayado rin ang ilang faith-based groups at advocates sa ating bansa dahil sa mahinang mga kasunduan. Para sa Center for Energy, Ecology and Development, bigo ang COP28 na bigyang-pansin ang agarang pangangailangan na itigil ang paggamit ng fossil fuels. Mabilisang phaseout ng fossil fuels daw ang kailangan.
Tayong mga Katoliko ay pinaaalalahanan ng ating pananampalatayang ang pangangalaga sa kalikasan ay isang sama-samang responsabilidad o common responsibility. Bawat isa sa atin ay may tungkuling protektahan at itaguyod ang integridad ng ating kalikasan. Katulad ng tagubilin ng Diyos sa Genesis 2:15, “inilagay [tayo] sa halamanan ng Eden upang alagaan at ingatan ito.” Kailangan nating magtulungan upang masigurong naaalagaan at naiingatan ang ating common home.
Mga Kapanalig, hindi natatapos sa COP28 ang ating tungkulin sa ating kalikasan. Mas mahalaga ang mga kongkretong aksyon pagkatapos nito upang masigurong mababawasan ang ating pagdepende sa fossil fuels. Sa ating munting paraan, magsimula tayo sa pagbabasa tungkol sa mga renewable energy sources. Sa mga sinasalihan nating grupo—katulad ng ating parokya—magtanung-tanong tayo kung sino ang makapagpapaliwanag sa atin tungkol sa malinis na enerhiya. At sa tulong ng mga kaalamang ito, sumali tayo sa mga panawagan sa pamahalaan na magpatupad ng mga patakarang tutulong magsalba sa naghihingalo nating mundo.
Sumainyo ang katotohanan.