1,205 total views
Mga Kapanalig, nailibing na ang tatlong estudyanteng namatay sa malagim na pamamaril ng dalawang estudyante sa isang high school sa Tacloban. Hustisya pa rin ang sigaw ng pamilya ng mga inosenteng biktima ng karahasan.
Nagsagawa ng pagdinig sa Senado para alamin ang ugat ng karahasang ito. Isa sa mga lumutang na posibleng dahilan kung bakit nakapatay ang dalawang bata ng kapwa nila bata ay ang tinatawag na online grooming. Maaalalang sinisisi ng marami ang paglalaro ng bayolenteng online games na nakaimpluwensya umano sa pag-iisip at pag-uugali ng mga batang sangkot sa karumal-dumal na krimen sa Tacloban. Pero may mas malalim na problema pa pala.
Natuklasang ang pamamaril sa Tacloban ay naimpluwensyahan ng isang online network na kung tawagin ay “764”. Target umano ng network na ito ang mga menor de edad. Ang 764 ay isang global network na nakabase sa mga online platforms gaya ng social media, gaming platforms, at messaging apps. Sa Amerika, tinukoy ang 764 bilang “nihilistic violent extremist network,” kahilera ng mga teroristang grupo. Layunin ng network na ito na “sirain” ang lipunan sa pamamagitan ng paglason sa isip ng mga bata at pagsasamantala sa kanila. Gumagamit sila ng pagbabanta, pamba-blackmail, at panloloko para pilitin ang biktima na mag‑produce o mag‑livestream pa nga ng pananakit nila sa kanilang sarili, pagmamalupit sa hayop, paggawa ng mga sekswal na bagay, at maging pagpapatiwakal o suicide.
Para makahanap ng mabibiktima, sumisiksik ang mga nasa likod ng 764 sa mga populár na online games at platforms, gaya ng Roblox at Minecraft na sikat na sikat ngayon sa kabataan. Pangunahing estratehiya nila ang online grooming kung saan gamit ang internet at teknolohiya, unti‑unting nakikipag-relasyon sa mga bata ang mga kriminal para sa layuning mang-abuso, manamantala, at manakit. Madalas nagtatago sila sa mga fake accounts, private servers, at mga “true crime” communities, at unti‑unting inaakit ang mga bata sa mas matinding content: mula sa maseselang pagbibiro hanggang sa aktwal na pananakit ng sarilil at paggawa ng karahasan. Kapag may nakuha na silang mga larawan at video ng mga biktima nila, ginagamit ang mga ito na pang‑blackmail para lalo pang kontrolin ang biktima at ipagpatuloy ang pananamantala at pang-aabuso.
Ipinadala na sa National Bureau of Investigation (o NBI) ang mga online posts na iniuugnay sa mga menor de edad na namaril ng kanilang mga kaeskuwela sa Tacloban. Para sa mga senador, posibleng may kaugnayan ang pagkalantad ng mga batang namaril sa tinatawag na “violent online ecosystem” sa pamamagitan ng 764.
Sa kanyang unang ensiklikal na Magnifica Humanitas, binanggit ni Pope Leo XIV ang online grooming bilang isang seryosong panganib sa kabataan. Aniya, hindi lang sa mga magulang at pamilya nakaatang ang responsabilidad na gabayan ang mga bata; dapat ding maging accountable o napananagot ang mga online platforms na may likha ng mga mapanganib na laro, apps, at online communities. Gaya ng sinasabi lagi ng Simbahan, ang teknolohiya ay dapat magsilbi sa mga tao—para igalang ang kanilang dignidad at tiyakin ang kanilang kabutihan. Hindi ito dapat gamitin para pagsamantalahan ang sinuman, lalo na ang mga musmos. Kapag ang mga online platforms ay nagbibigay-daan sa grooming, kailangan ng mas mahigpit na safeguards para proteksyunan ang gumagamit ng mga ito.
Mga Kapanalig, sa Mateo 18:6, nagbabalâ si Hesus: “sinumang maging sanhi ng pagkakasala ng isa sa maliliit na ito…, mas mabuti pa sa taong iyon na bitinan ang kanyang leeg ng isang malaking batong gilingan, at siya’y lunurin sa kailaliman ng dagat.” Tunay na napakabigat na pagkakasala ang pagsasamantala sa mga bata, kaya maging masigasig sana ang gobyerno na alisin ang mga lumalason sa kanilang pag-iisip.
Sumainyo ang katotohanan.
