29,966 total views
Pumanaw na si Sr. Zeny Cabrera ng Sisters of the Holy Eucharist makaraang ang ilang araw na pananatili sa pagamutan.
Ayon sa kongregasyon, pumanaw ang madre kaninang 5:10 ng madaling araw sa Commonwealth Hospital.
Una na ring isinugod sa hospital si Sr. Cabrera noong Sabado ng umaga, makaraang atakihin sa puso na nakaapekto sa kaniyang utak at ilang araw na nasa comatose.
Kilala ang madre sa kanyang pagmimisyon na mangalaga sa mga person’s deprived of liberty o PDL at kasalukuyang coordinator ng Caritas Manila Restorative Justice Ministry.
Layunin ng kanyang misyon ang mabigyang pagkakataon sa mga bilanggo na magbago, muling tanggapin sila sa kanilang pamilya at komunidad, at maging mga produktibong miyembro ng lipunan.
Una na ring inihayag ni Sister Cabrera na ang karisma ng kanilang kongregtasyon ay ihanda ang paghahanda ng hapag sa Panginoon para sa mga bilanggo na ayon sa kultura ng ‘Salu-salo,’ na isang tradisyong Pilipino ng pagsasama-sama sa hapag-kainan kasama ang mga kaibigan at pamilya.
Itinuon ng madre ang higit sa 20 taon ng kaniyang paglilingkod sa pangagalaga sa mga bilanggo katuwang ang Archdiocese of Manila at Sisters of the Holy Eucharist na nakabase sa Diocese ng Novaliches.
Sa kasalukuyan ay wala pang detalyeng inilalabas ang kongregasyon kaugnay sa paglalagakan ng labi ng namayapang madre.
