843 total reads
Hayaang lumapit ang mga bata kay Hesus.
Mula sa ebanghelyo ngayong araw na ito ang buod ng mensahe ni Manila Archbishop Luis Antonio Cardinal Tagle sa pagbibinyag sa mahigit 400 bata na inaalagaan ng Tulay ng Kabataan Foundation Incorporated na isinagawa sa Minor Basilica of Immaculate Concepcion o Manila Cathedral.
Ayon kay Cardinal Tagle, napakahalaga ng araw na ito sa mga batang bininyagan dahil ito ay araw ng muling pagsilang o birthday para sa mga bata at mga sanggol bilang bagong kasapi ng Simbahang Katolika at pakikibahagi bilang anak ng Diyos at kapatid ni Kristo.
Ipinaalala ng Kardinal na tungkulin ng mga magulang na akayin at arugain ang mga bata sa kanilang paglaki, ilapit at gawing huwaran si Hesus.
“Ituro kung papano si Hesus naging masunurin sa Diyos, paano nagmalasakit sa kapwa. Ituro kung papano si Hesus tumanggap sa iba-ibang tao lalung-lalo sa mga hindi minamahal ng lipunan. Ipakilala si Hesus.”pahayag ni Cardinal Tagle
Sinabi ni Cardinal Tagle na sa pamamagitan ng pagbibinyag na ito ay magiging templo ng banal na esperitu santo ang katawan ng mga bagong binyag na bata na katulad ni Hesus.
Hinimok ng Kardinal ang mga magulang na huwag hayaan ang kanilang mga anak na lumaking hindi nakilala si Hesus na ngayon ay kabilang na ng mas malawak na pamilya ang simbahan.
“Sabi ni Hesus sa ebanghelyo, hayaan niyong lumpit ang mga bata sa akin, huwag niyo silang pigilan, sila ang malaking pamilya, ilapit natin sila kay Hesus. Huwag hayaan na ang mga bata ay lumaking hindi nakikilala si Hesus. Akayin at ipakilala sila sa kanilang kapatid na si Hesus”pahayag ng Kardinal
Pinaalalahanan din ni Cardinsl Tagle ang mga ninong at ninang na ang pagiging pangalawang magulang ay hindi lamang pang- komersiyo na kailangan lang magbigay ng material na bagay sa inaanak.
“Tayong mga Filipino,akala natin ang papel ng ninong at ninang ay magbigay ng pakimkim, sobre, regalo. Ang ninong at ninang hindi lamang taga-bigay ng regalo, sila ay katuwang ng magulang na kahit walang pakimikm o regalo ang inyong pagtulong sa magulang ay panalangin at mabuting halimbawa at asal”paalala ni Cardinal Tagle
Iginiit ni Cardinal na ang pagbibinyag ay hindi lamang tungkol sa komersiyo kundi ang paglago sa buhay pananampalataya.
Katuwang ni Cardinal Tagle ang 10- pari sa pagbibinyag sa may 400 mga bata at sanggol na galing sa slum area ng Aroma at Market 3 Port of Navotas na nasunugan noong nagdaang araw.
Ipinahayag naman ni Father Matthieu Dauchez, executive director ng T-N-K na kung mahirap dalhin sa Diyos ang mga sugatang bata ay napakadaling dalhin si Hesus sa kanila sa pamamagitan ng mga sakramento.
Ang Tulay ng Kabataan ay nagsisilbi sa may 1,500 mga kabataan mula sa pinaka-mahihirap na pamilya at pinaka-mahihirap na lugar sa Metro Manila noong pang 1998 sa paamagitan ng apat na programa upang maibalik ang dignidad ng mga street children, street children with special needs at mga magbabasura.
Ang TNK ay mayroong 24 na mga centers.
