Nagsagawa ang EcoWaste Coalition katuwang ang Sanlakas Cebu at Barangay Tejero, Cebu City ng Sinulog-inspired parade sa Cebu City bilang bahagi ng pagdiriwang ng Zero Waste Month at panawagan para sa makakalikasang selebrasyon ng Sinulog Festival.
Tema ng gawain ang “Sinulog sa Kabatan-onan Alang sa Kinaiyahan” o Sinulog ng Kabataan para sa Kalikasan, tampok ang dalawang oras na street dancing na nilahukan ng nasa 50 residente ng Barangay Tejero, karamihan’y kabataan, dala-dala ang imahen ng Santo Niño, at mga banner at placard na may mensaheng isinusulong ang malinis na pagdiriwang ng Sinulog.
Isinagawa ang parada sa Ponce Street malapit sa Carreta Cemetery at nagtapos sa pamamagitan ng programa sa Barangay Tejero Gymnasium.
Binigyang-diin ni Barangay Tejero Captain Harold Seno na kaakibat ng Sinulog Festival ang pagdagsa ng mga tao at turista, gayundin ang naiiwang tambak ng basura, kaya’t mahalaga ang sama-samang pagkilos upang mapanatiling malinis ang mga kalye at plaza.
“Sinulog attracts millions of people from within Cebu and afar and it can generate tons upon tons of garbage, especially single-use plastic and food waste. We are one with the EcoWaste Coalition in reminding residents and visitors to join hands in keeping our streets and plazas litter-free,” ayon kay Seno.
Sang-ayon naman dito si EcoWaste Coalition National Coordinator Aileen Lucero at sinabing sa pamamagitan ng mga ganitong uri ng pagdiriwang ay naisusulong rin ang pangangalaga at pagpapanatili ng kalinisan sa kapaligiran.
Dagdag ni Lucero na ang Sinulog ay hindi lamang pagdiriwang ng pananampalataya at kultura, kundi paalala rin na tungkulin ng bawat isa ang pangangalaga sa kalikasan sa pamamagitan ng zero waste lifestyle.
“Zero waste is not just a hollow buzzword — it’s a lifestyle change that we must adopt together to combat plastic pollution and preserve our planet for ourselves and the future generations,” saad ni Lucero.
Tinalakay din sa programa ang kahalagahan ng Republic Act 9003 o ang Ecological Solid Waste Management Act at ang tungkulin nito sa pagpapanatili ng kalinisan at kaayusan ng kapaligiran.
Magugunita sa 128th Plenary Assembly ng Catholic Bishops’ Conference of the Philippines (CBCP) noong July 2024, kabilang sa anim na ecological actions na itinakdang pagtutuunang pansin ng simbahan ang pagsuporta sa mga pagsisikap laban sa plastic pollution.
