12,047 total reads
Nagkaisa ang iba’t ibang grupo at simbahan sa lalawigan ng Antique upang mariing tutulan ang planong ideklara ang itaas na bahagi ng mga bayan ng Patnongon, San Remigio, Valderrama at Sibalom bilang mineral reservation.
Sa ipinadalang position paper kay Mines and Geosciences Bureau (MGB) Region VI Director Cecilia Ochavo-Saycon, ipinaliwanag ng grupo ang mga panganib na maaaring idulot sa kapaligiran, lipunan, at ekonomiya ng nasabing panukala.
Binigyang-diin dito ang pangmatagalang epekto ng mineral reservation project sa mahahalaga at iniingatang likas na yaman, seguridad sa pagkain, at kabuhayan ng mga pamayanan ng Antique.
“Our arguments are anchored on the principles of sustainable development, a firm commitment based on sound evidence, community perspectives, and a reservation threatens the area’s vital watersheds, agricultural systems, and the well-being of its people,” bahagi ng panawagan ng grupo kay Saycon.
Tinukoy ng grupo ang mga alalahaning dapat pagtuunan ng MGB bago tuluyang maisakatuparan ang mineral reservation project.
Ito ang water security and agriculture; pagdami ng kalamidad dulot ng landslide at pagbaha; pagsasantabi sa mga layunin ng Sustainable/Regenerative Development Goals; epekto sa kalusugan at kabuhayan ng pamayanan; Environmental Risks and Accountability; pagiging lehitimo ng pagdinig na isinagawa ng MGB, at ang pagpapalikas at militarisasyon ng mga komunidad.
“Our group respectfully request your office to carefully review the points raised and reconsider the declaration of Antique’s natural and human resources. It is our shared hope that you will prioritize the principles of sustainability and the long-term interests of the communities affected,” dagdag ng grupo.
Kabilang naman sa mga lumagda sa liham sina San Jose de Antique Bishop Marvyn Maceda; Diocesan Ecology Ministry head, Fr. Frederik Rubido; Diocesan Social Action Commission director, Fr. Joeselito Escote; at iba pang mga kinatawan ng simbahan, at civil society at non-government organizations.
Sa Laudato Si’, una nang nagpahayag ng mariing pagtutol ang Kanyang Kabanalan Francisco hinggil sa industriya ng pagmimina dahil nag-iiwan lamang ito ng labis na pinsala at paghihirap sa kalikasan at mga apektadong pamayanan.
