27,308 total views
Inaanyayahan ng Pondo ng Pinoy ang mga Pilipino na makiisa sa ‘Fast2Feed Campaign’ ngayong 2026 ngayong Kuwaresma.
Ito ay upang patuloy na mapakain ang mga batang benepisyaryo sa mga Integrated Nutrition Program at malabanan ang malnutrisyon.
Sa pamamagitan ng paglalaan ng kinse peso kada araw sa loob 120-araw o mahigit anim na buwan ay maaring makapag-ipon ng 1,800-pesos na ibabahagi sa Pondo ng Pinoy.
“Anumang matitipid mo mula sa pag-aayuno ngayong Kuwaresma ay maaari mong ihandog sa Pondo ng Pinoy upang makatulong sa pangmatagalang pagbabago sa buhay ng mga kabataan at komunidad,” ayon sa mensahe ng Pondo ng Pinoy.
Katuwan ng Institusyon ang Assisi Foundation na layuning din makapagbigay ng sapat na oportunidad sa mga batang benepisyaryo.
Ito ay upang labanan ang stunting o pagkabansot at malnutrisyon kung saan sa pamamagitan ng pagkamit ng mga kinakailangang pagkain o bitamina ng kanilang katawan ay nagiging maayos ang kanilang paglaki.
“Ang Pondo ng Pinoy at Assisi ay nangangarap ng ganap na buhay, lalo na para sa mga batang mula sa mahihirap at laylayan na komunidad. Sa kasamaang-palad, patuloy pa ring suliranin ang gutom at malnutrisyon, lalo na sa mga bata. Sa pamamagitan ng inyong patuloy na suporta sa FAST2FEED, makapagbibigay tayo ng masustansyang pagkain upang mabigyan sila ng pagkakataong magkaroon ng maayos na kalusugan, tamang paglaki, at ganap na pakikilahok sa lipunan,” ayon pa sa mensahe ng Pondo ng Pinoy.
Kaugnay ng paglaban sa Malnutrisyon, una ng naitala ng Caritas Manila na higit na sa 75-libong bata ang natulungang makaahon mula sa mga suliraning dulot ng malnutrisyoon.
