41,349 total views
Ayon kay Kidapawan Bishop Jose Colin Bagaforo, chairman ng CBCP-Episcopal Commission for Inter-Religious Dialogue, biyaya ang pagkakataon na kapwa panahon ng higit na pagninilay, pagdarasal, at sakripisyo para sa mga Kristiyano at Muslim sa buong mundo.
Pagbabahagi pa ng Obispo na siya ring Co-president ng Pax Christi International, ang sabayang pagdiriwang ay hindi lamang isang pagkakataon kundi isang paanyaya ng Diyos para sa mas malalim na pagkakaisa at pagtutulungan.
“Nagkataon ngayong 2026 ay [halos] magkasabay ang selebrasyon ng mahalagang aspekto ng ating pananampalatayang Kristyano at pananampalatayang ating mga kapatid sa Islam. We will be starting the season of Lent [through] Ash Wednesday and also the beginning of Ramadan, yung one month fasting and prayer ng ating mga kapatid na Islam. Kaya ang aming spiritual discernment dito ay grasya sa ito galing sa Diyos na nagkataon magkasabay tayo at nagkataon din na dahil magkasabay tayo ay panahon na siguro nating tingnan kung paano tayo magtulungan at paano tayo magkaisa sa maraming mga bagay.” Bahagi ng pahayag ni Bishop Bagaforo sa Radyo Veritas.
Paliwanag ni Bishop Bagaforo, mahalaga ang pagtugon ng bawat isa panawagan na pagkakaisa hindi lamang sa puso at damdamin kundi sa iisang hangarin para sa bayan.
Ayon sa Obispo, ito rin ang mensahe ng napiling tema ng CBCP-Episcopal Commission for Inter-Religious Dialogue na ‘Hands Together, Hearts United’ para sa kauna-unahan nitong Forum on Interfaith Common Action na panawagan sa sama-samang pagtugon sa pangangailangan ng kapwa.
Hinikayat naman ni Bishop Bagaforo ang lahat na gawing panahon ng pagbabalik-loob ang Kwaresma at ang Banal na Buwan ng Ramadan na isang panahon ng pagtanggap ng kapatawaran ng Diyos at pamumuhay nang matuwid at tapat sa Kanyang mga utos.
“Kaya nga, napili namin tema dito ‘Hands Together, Hearts United’ Sama-sama sagutin natin ang mga pangangailangan natin bilang mga magkakapatid dito sa balat ng lupa. Pero magkaisa yung ating puso, yung ating damdamin, magkaisa yung ating hangarin. Matanggap natin ang patawad ng Diyos sa ating mga kasalanan at magkaroon tayo ng bagong buhay na matuwid at tapat sa mga utos ng Diyos.” Dagdag pa ni Bishop Bagaforo.
Umaasa rin si Bishop Bagaforo na ang sabayang pagdiriwang ay magbunga ng mas maayos at mapayapang ugnayan sa pagitan ng mga Kristiyano at Muslim tulad ng mga magkakapatid hindi lamang sa lipunan kundi maging sa mata ng Diyos.
“Sana naman magbunga ito muling harmonious relationship between Islam at mga Kristiyano. At higit sa lahat, sana itong grasya ng Diyos na magkasabay ang ating selebrasyon ay maging panawagan na hindi tayo magkakalayo. Lahat tayo ay anak ng Diyos. At lahat tayo ay makakapatid. Kaya dapat ay magmahalan tayo.” Ayon pa kay Bishop Bagaforo.
Giit ng Obispo, sa gitna ng iba’t ibang mga hamon ng panahon ay nananatili ang malinaw na mensahe ng Simbahan na panawagan sa lahat para sa pananalangin, pag-aayuno, at pagkakawanggawa na kapwa diwa ng Kuwaresma at Ramadan na maituturin ding tulay tungo sa tunay na kapayapaan at pagkakapatiran sa lipunan.
Batay sa tala, umaabot sa 10-milyon ang bilang ng mga Muslim sa Pilipinas kung saan mayorya ay mga Katoliko.
