Mga Kapanalig, walang nagbabawal sa mga kandidato ngayong eleksyon o sa kanilang mga tagasuporta na magsagawa ng tinatawag na “negative campaigning”. Tugon ito ng Commission on Elections (o COMELEC) sa pagpapatutsadahan ng mga kampo ni Pangulong Bongbong Marcos Jr at ni dating Pangulong Rodrigo Duterte kasabay ng pag-endorso nila sa kani-kanilang manok sa Senado.
Sa ilalim ng Fair Elections Act, pinapayagan ang paglalathala o pagbo-broadcast ng mga political advertisement o patalatas at mga propagandang pabor o hindi pabor sa sinumang kandidato o partidong pulitikal. Pero paalala ng COMELEC, panatilihin sana ng mga kandidato at kanilang mga tagasuporta na “classy” at may paggalang pa rin ang gagawin nilang negative campaigning. Posible pa rin kasi silang papanagutin sa batas kung mapatutunayang ang kanilang sinasabi tungkol sa kanilang mga kalaban ay makokonsiderang paninirang-puri na o libel. Sa isyu ng palitan ng maaanghang na salita ng malalaking kampo sa pulitika para lamang iangat ang kani-kanilang mga kandidato, sinabi ng COMELEC na bahagi ng karapatan ng dati at kasalukuyang presidente sa freedom of expression ang kanilang ginawa. Wala raw sa posisyon ang COMELEC na bantayan ang mga sasabihin at gagawin ng mga kandidato at mga tagasuporta nila.
Asahan na natin ang batuhan ng putik at labasan ng baho ng mga magkakalaban hanggang sa araw na matapos ang kampanya. Hindi na natin sila mapipigilan, pero tayong mga botante ay hindi na sana makisawsaw sa negative campaigning. Oo, karapatan nating ipahayag ang ating saloobin tungkol sa pulitika at ang ating opinyon tungkol sa mga kandidatong napupusuan o kinasusuklaman natin. Pero hindi ito lisensya para gamitin ito sa paninira at, ang mas nakababahala, sa pagpapakalat ng maling impormasyon.
Laganap ang panlilinlang tuwing eleksyon, at pinalalâ pa ito sa paggamit ng napakarami sa atin ngayon ng social media. Sa isang bansang napakababa ng tinatawag na media literacy ng mga tao, napakarami sa atin ang madaling mapaniwala ng mga nababasa at napapanood natin sa social media. Uso na rin ang mga “online warriors” ng mga kandidato na handa silang iangat at ipagtanggol o kaya naman ay siraan ang nasa kabilang bakod. Pinagkakakitaan na nga ito ng ilan nating kababayang walang mahanap na regular na trabaho o naghahanap ng sideline. Nakalulungkot na naitutulak ang ating mga kababayan na maging intrumento ng kasinungalingan at paninira. Hindi naman natin sila masisisi kung kailangan nilang maghanap ng maipambibili ng anumang kailangan ng kanilang pamilya o kapag may tinatanaw silang utang na loob sa pulitikong pinagsisilbihan nila.
Ito ang malungkot na katotohanan sa ating pulitika. Malayo ito sa hangarin ng ating Santa Iglesia. Sa Catholic social teaching na Fratelli Tutti, inilarawan ni Pope Francis ang isang “better kind of politics”, isang mas mabuting uri ng pulitika.
Anong uri ng pulitika ito? Isang pulitika itong pinaglilingkuran ang kabutihang panlahat; isang pulitikang may pagtanaw sa kinabukasan at may kakayahang tugunan ang mga kasalukuyang krisis na kinakaharap ng taumbayan. Hangarín sana natin ang isang pulitikang binabago ang mga institusyon sa halip na isulong ang pansariling interes ng iilan. Mamayani sana sa atin ang isang pulitikang naghahahangad ng pagkakapatiran sa kabila ng ating mga pagkakaiba-iba. Ngunit hindi rin nararapat ang pulitikang binubulag ang mga tao kapalit ng salapi at itinatago sa kanila ang katotohanan tungkol sa mga lingkod-bayan. Lalabas at lalabas din ang katotohanan; “walang natatagong ‘di malalantad, at walang lihim na di mabubunyag,” wika nga sa Marcos 4:22.
Mga Kapanalig, ngayong eleksyon, sa halip na pagtuunan natin ng pansin at enerhiya ang negatibong pangangampanya, hanapin natin sa mga kumakandidato ang kanilang mga plano at plataporma. Alamin natin ang mga interes na handa nilang protektahan. Suriin natin ang kakayahan nilang mamuno at ang katapatan nilang maglingkod.
Sumainyo ang katotohanan.
