162,789 total reads
Ang laking bentahe ng online work dito sa ating bansa, lalo na para sa mga kababaihan. Nagbubukas ito ng oportunidad at mga bagong posibilidad. Sa pamamagitan ng online work, mas napapadali ang pag-access nila sa trabaho nang hindi na kailangang lumabas ng bahay. Ito ay isang magandang pagkakataon para sa mga kababaihan na magkaroon ng flexible na oras sa para sa trabaho at kanilang mga responsibilidad sa tahanan.
Dahil dito, dumarami na nga kapanalig, ang mga female online workers sa bansa. Ayon sa isang pag-aaral, mga 62% ng online workers sa ating bansa ay mga babae. Marami ang na-eengganyo dito dahil maliban sa flexibility, marami pa itong benepisyo sa kanila.
Isa na dito ay ang pagkakaroon ng mas malawak na oportunidad sa trabaho. Hindi na limitado ang kanilang pagpili ng trabaho base sa lokasyon. Hindi na rin sila limitado sa oras. Kung dati, 8 to 5 lamang ang opsyon, ngayon, kahit anong oras, umaga man o gabi, pwede na. Maaari rin silang magtrabaho sa kahit anong kumpanya sa iba’t ibang bahagi ng Pilipinas o maging sa ibang bansa.
Bukod dito, ang online work ay nagbibigay din ng pagkakataon sa mga kababaihan na maging mas independent at magkaroon ng kontrol sa kanilang oras. Dahil sa flexible na oras ng trabaho, mas madali para sa kanila na ma-manage ang kanilang oras at magawa ang iba pang mga bagay na mahalaga sa kanilang buhay. May pagkakataon pa silang mag upskill at maghanap pa ng ibang kasanayan.
Sa online work, mas napapalapit din ang mga kababaihan sa larangan ng teknolohiya. Dahil kailangan ng internet at computer literacy sa online work, mas nagiging proficient sila sa paggamit ng mga teknolohiya na maaari rin nilang magamit sa iba pang larangan.
Ang daming bentahe nito para sa mamamayan, lalo na sa kababaihan, pero may mga aspeto dito na dapat ding pag-ingatan. Unregulated pa ang online work sa bansa, at marami sa mga manggagawa dito ay bitin sa social protection pati na rin sa tenure at stability. De-kontrata din sila dito, kaya’ karaniwan pag endo na, hanap na naman ng iba, Ang mga benepisyo gaya ng health benefits, dental, o minsan kahit leaves, wala rin. Ilan lamang ito sa mga isyung nakapaligid sa online work na dapat tutukan. Kapag hindi kasi nabalanse ito, ang oportunidad na dala ng online work ay hindi natin mao-optime at maximize. Lugi din ang manggagawa dito. Sabi nga sa Rerum Novarum: Among the most important duties of employers, the principal one is to give all workers what is justly due them.
Sumainyo ang Katotohanan.
