449 total views
Prayoridad ng Diocese ng Surigao ang makatulong muna at patuloy na umagapay sa pagbangon ng mga residenteng naapektuhan ng bagyong Odette bago isaalang-alang ang rehabilitasyon o pagpapagawa sa mga nasirang parokya o kapilya.
Ito ang inihayag ni Rev. Fr. Denish Ilogon, Social Action Director ng nasabing Diyosesis sa mga plano para sa pagpapagawa ng mga nasirang Simbahan sa kanilang lalawigan partikular na sa Dinagat Island at Siargao.
Sinabi ni Fr. Ilogon na bagamat marami sa kanilang mga parokya at kapilya ang nawasak ng bagyong Odette ay hindi pa nila napag-iisipan kung paano ito maipapatayong muli lalo na’t nakatuon ang kanilang mga pagkilos sa relief and rehabilitation programs para sa mamamayan.
“Actually marami talagang simbahan na nasira mga chapel na nasira pero sa ngayon tulad ako sira din ang Cathedral ko pero hindi ko po inuna yun Cathedral kasi ang inuuna natin ang mga tao na hirap pa din sila at kapag naulan ang iniisip ko yun mga bahay na walang bubong yun mga bahay na trapal lang ang takip,” ani Fr. Ilogon na siya ring Parish Rector ng San Nicolas de Tolentino Cathedral Parish sa Surigao Del Norte.
Sinabi ng Pari na sa ngayon hindi lamang mga mananampalatayang Katoliko ang kanilang tinutulungan dahil ilang mga residente mula sa iba’t-ibang relihiyon ang kanila na rin napagsilbihan.
“Unang-una ang tinututukan muna namin, ‘yung parishioners namin, ‘yung mga tao, hindi lang Katoliko pati ‘yun mga hindi Katoliko tinutulungan din namin.. ‘yun muna ang pinaglalaan namin ng panahon ngayon kasi lalong-lalo na kapag umuulan nakikita mo yun hirap nila wala sila mataguan, ‘yun mga gamit nila laging nababasa,” pahayag pa ni Fr. Ilogon.
Magugunitang hindi nakaligtas sa pinsala ng bagyong Odette ang mga simbahan at pook-dasalan sa Visayas at Mindanao.
Patuloy naman ang pagbibigay tulong ng Diocese of Surigao at iba pang mga Diyosesis sa bahagi ng relief intervention at sa rehabilitasyon sa mga kabahayan ng mga residente na inaasahang tatagal pa ng ilang buwan.
