527 total reads
Nagkaisa ang ibat-ibang labor at concerned groups na iparating sa pamahalaan ang pagsasabatas ng Paid Pandemic Leave (PPL).
Sa liham na ipinadala ng may 21 grupo sa pangunguna ng Kilusan ng Manggagawang Kababaihan (KMK), Alliance of Nationalist and Genuine Labor Organizations (ANGLO), Kilusang Mayo Uno (KMU) at Association of Democratic Labor Organizations (ADLO) ay kanilang ipinananawagan sa pamahalaan ang pagsuporta rin sa mga batas na kasalukuyang dinidinig sa Senado at Kongreso.
Ito ay ang mga batas nina Senator Leila Delima na Senate Bill 2148 at Gabriela Partylist na House Bill 7909 na layong magkaroon ng hiwalay na pandemic leave ang mga manggagawang mahahawaan ng COVID-19 at nagkaroon ng exposure sa mga taong magpopositibo mula sa virus.
Pagpapabatid pa ng mga grupo, ito ay dahil na rin sa mga pangambang marami ng manggagawa ang nahahawaan ng COVID-19 dahil na rin sa banta ng Omicron variant.
“Kami po, mga manggagawa at labor advocates, ay lumalapit sa inyong mga lingkod upang ipaabot na lubos na apektado kaming muli ng surge na dulot ng Omicron variant ng COVID-19. may pambihirang paglaki ngayong Enero,” pahayag ng grupo.
Ang usapin ng Paid Pandemic Leave at nagsimula ng himukin ng Department of Labor and Employment ang mga employers ng pribadong kompanya na ipatupad ang hiwalay na official leave ng kanilang mga empleyadong mahahawaan o magkakaroon ng exposure sa COVID-19.
Patuloy naman ang panghihimok ng Simbahang Katolika sa bawat namumuhunan na bigyan ng nararapat na pagpapahalaga at dignindad ang bawat isa sa kanilang mga manggagawa, ito ay sa pamamagitan ng pagagawad ng wastong pasahod at ibat-ibang uri ng benepisyo.
