704 total views
Pinaalalahanan ng kinatawan ng Kanyang Kabanalan Francisco sa Pilipinas ang mananampalataya na pagyamanin ang sarili bilang templo ng Panginoon.
Ito ang bahagi ng pagninilay ni Papal Nuncio to the Philippines Archbishop Charles John Brown sa pagtalaga ng dambana ng Holy Family Parish sa Gulod Novaliches, Quezon City noong November 5, 2022.
Ipinaliwanag ng arsobispo na ang tunay na simbahan ay ang mananampalatayang nagbubuklod sa pananalangin at pagpupuri sa Panginoon.
“This place that we are gathered here in the Holy Family Parish, this a house, this is a building, we call it a church but what this word church originally referred to? The original meaning and foundation of the Church? It is us, you and I, the temples of God. You and I as baptized Christian is the temple of God,” pahayag ni Archbishop Brown.
Apela ng nuncio sa nasasakupang parokya na patuloy magbuklod bilang pamayanan upang higit na lumago ang pananampalataya at ang simbahan na katuwang ni Hesus sa misyong palaganapin ang Salita ng Diyos sa buong komunidad.
Pinangunahan ni Archbishop Brown ang pagtalaga ng dambana kasabay ng pagdiriwang sa ika – 25 anibersaryo ng pagkatatag ng parokya.
Kasama ng nuncio si Novaliches Bishop Roberto Gaa, mga bisitang pari at kinatawan ng Piarist Fathers – Province of Asia Pacific sa pangunguna ni Fr. Miguel Artola, Sch.P.
Kasalukuyang pinangangasiwaan ni Piarist Fr. Wilmer Samillano ang parokya na sa pagsusumikap at pagtutulungan ng parishioners ay natapos ang pagpapagawa ng simbahan.
Pinasalamatan ni Fr. Samillano ang lahat ng nakiisa at tumulong na maisaayos ang simbahan gayundin ang mga paring naunang naglingkod sa parokya.
Naitatag ang Holy Family Parish noong 1997 sa ilalim ng Archdiocese of Manila na unang pinamahalaan ni Fr. Jose Joel Jason na sinundan ni Fr. Rico Garcia, Fr. Aldrin Lopez, Fr. Jaime Lara, Fr. Alfredo Maglangit, Sch.P., at Fr. Dennis Descallar, Sch.P.
