5,378 total reads
Biyernes ng Ika-7 Linggo sa Karaniwang Panahon (I)
Sirak 6, 5-17
Salmo 118, 12. 16. 18. 27. 34. 35
Sa pagsunod sa utos mo, Poon, pangunahan mo ‘ko
Marcos 10, 1-12
Friday of the Seventh Week in Ordinary Time (Green)
UNANG PAGBASA
Sirak 6, 5-17
Pagbasa mula sa aklat ni Sirak
Ang magiliw na pangungusap ay nakaaakit ng maraming kaibigan,
at ang matamis na pananalita’y susuklian ng magandang sagot.
Makipagbatian ka sa maraming tao,
ngunit isa lamang sa sanlibo ang hihingan mo ng payo.
Bago ka makipagkaibigan kaninuman, subukin mo muna siya,
at huwag mo siyang pagtitiwalaan agad.
Sapagkat may mga kaibigang mapagsamantala
na di mo maaasahan sa oras ng pangangailangan.
May kaibigang hindi nagtatagal at nagiging kaaway mo,
at ibubunyag pa niya ang pagkakagalit ninyo,
Anupat lalabas kang kahiya-hiya.
Mayroon ding kaibigang kasalu-salo mo sa pagkain,
ngunit pababayaan ka sa oras ng kagipitan.
Sa kasaganaan, didikit siya sa iyo na parang anino,
uutusan niya pati ang mga katulong mo;
ngunit sa kasawia’y pababayaan ka niya,
pagtataguan ka, at di mo na siya makikita.
Lumayo ka sa kaaway,
at mag-ingat ka sa kaibigan.
Ang matapat na kaibiga’y parang matibay na kuta,
pag nakatagpo ka ng tulad niya’y para kang nakahukay ng malaking kayamanan.
Walang kasinghalaga ang matapat na kaibigan
hindi siya matutumbasan ng gaano mang salapi.
Ang matapat na kaibiga’y parang gamot na nagbibigay-buhay,
at siya’y matatagpuan lamang ng mga may takot sa Panginoon.
Ang may takot sa Panginoo’y makatatagpo ng tapat na kaibigan
at ang mga kaibigan niya’y tulad niyang may takot sa Panginoon.
Ang Salita ng Diyos.
SALMONG TUGUNAN
Salmo 118, 12. 16. 18. 27. 34. 35
Sa pagsunod sa utos mo, Poon, pangunahan mo ‘ko
Pupurihin kita, Poon, ika’y aking pupurihin,
ang lahat ng tuntunin mo ay ituro mo sa akin.
Sa pagsunod sa utos mo, Poon, pangunahan mo ‘ko
Sa bigay mong kautusa’y lubos akong nalulugod,
iingatan sa puso ko upang iyo’y di malimot.
Sa pagsunod sa utos mo, Poon, pangunahan mo ‘ko
Buksan mo ang paningin ko pagkat nananabik masdan,
yaong buting idudulot sa akin ng iyong aral.
Sa pagsunod sa utos mo, Poon, pangunahan mo ‘ko
Ang lingkod mo ay turuang masunod ang kautusan,
sa utos mong mapang-akit, ako nama’y mag-aaral.
Sa pagsunod sa utos mo, Poon, pangunahan mo ‘ko
Ituro mo ang batas mo’t sisikapin kong masunod,
buong pusong iingata’t susundin nang buong lugod.
Sa pagsunod sa utos mo, Poon, pangunahan mo ‘ko
Sa pagsunod sa utos mo, ako’y iyong pangunahan,
sa utos mo’y naroon ang ligayang inaasam.
Sa pagsunod sa utos mo, Poon, pangunahan mo ‘ko
ALELUYA
Juan 17, 17b
Aleluya! Aleluya!
Amang D’yos ni Hesukristo,
ang salita mo’y totoo,
kami ay pabanalin mo.
Aleluya! Aleluya!
MABUTING BALITA
Marcos 10, 1-12
Ang Mabuting Balita ng Panginoon ayon kay San Marcos
Noong panahong iyon, si Hesus ay nagtungo sa lupain ng Judea, at nagtuloy sa ibayo ng Ilog Jordan. Muli siyang pinagkalipumpunan ng mga tao, at tulad ng dati’y nagturo sa kanila.
May mga Pariseong lumapit kay Hesus. Ibig nilang masilo siya kaya’t kanilang tinanong, “Naaayon ba sa Kautusan na hiwalayan ng lalaki ang kanyang asawa?” Tugon niya, “Ano ang utos sa inyo ni Moises?” Sumagot naman sila, “Ipinahintulot ni Moises na hiwalayan ng lalaki ang kanyang asawa matapos bigyan ng kasulatan sa paghihiwalay.” Ngunit sinabi ni Hesus, “Dahil sa katigasan ng inyong ulo kaya niya inilagda ang utos na ito. Subalit sa pasimula pa, nang likhain ng Diyos ang sanlibutan: ‘Nilalang niya silang lalaki at babae. Dahil dito’y iiwan ng lalaki ang kanyang ama at ina, at magsasama sila ng kanyang asawa, at sila’y magiging isa.’ Kaya’t hindi na sila dalawa kundi isa. Ang pinagsama ng Diyos ay huwag paghiwalayin ng tao.”
Pagdating sa bahay, ang mga alagad naman ang nagtanong kay Hesus tungkol sa bagay na ito. Sinabi niya sa kanila, “Ang sinumang lalaking humiwalay sa kanyang asawa at mag-asawa sa iba ay gumagawa ng masama sa kanyang asawa – siya’y nangangalunya. At ang babaing humiwalay sa kanyang asawa at mag-asawa sa iba ay nangangalunya rin.”
Ang Mabuting Balita ng Panginoon.
PANALANGIN NG BAYAN
Ikapitong Linggo sa Karaniwang Panahon
Biyernes
Nakikibahagi sa paglikha ng Diyos ng bagong buhay ang mga asawa at mga maybahay. Para sa mga pangangailangan ng mga magulang at mga anak ang ating kahilingan ngayon.
Panginoon, dinggin Mo ang aming panalangin.
o kaya
Panginoon, basbasan Mo ang aming mga mag-anak.
Ang ating Simbahan nawa’y maging totoo sa kanyang pagtatanggol sa integridad ng sakramento ng kasal at ng pamilya, manalangin tayo sa Panginoon.
Ang mga pinuno ng gobyerno at mga mambabatas nawa’y magpasa ng mga batas at panuntunan na nagtatatag ng pamilya at hindi sumisira nito, manalangin tayo sa Panginoon.
Sa mga pamilya na nasira ng diborsyo o kaya ng paghihiwalay nawa’y makatagpo sila ng suporta at pang-unawa mula sa mga komunidad na kanilang kinabibilangan, manalangin tayo sa Panginoon.
Sa mga pamilya nawa’y magbigay ng inspirasyon sa kanilang pamumuhay bilang komunidad ang mga ehemplo nina Maria at Jose, manalangin tayo sa Panginoon.
Ang ating yumaong mga kamag-anak at mga kaibigan nawa’y makakita ng kasiyahan sa kapayapaan ng walang hanggang tahanan ng Diyos, manalangin tayo sa Panginoon.
Diyos ng pag-ibig, nilikha mo kaming lalaki at babae upang ipagpatuloy ang iyong paglikha. Ang pag-ibig namin sa isa’t isa nawa’y sumalamin sa iyong pananatili sa amin. Hinihiling namin ito sa pamamagitan ni Kristong aming Panginoon. Amen.
