HEALING MASS SA VERITAS December 5, 2022 | 6:00 PM

Troublemaker

 5,570 total reads

Mga Kapanalig, nang tanungin ang kanyang opinyon tungkol sa umano’y pagtanggap ng pera mula sa China at Hong Kong ng isang kompanyang iniuugnay sa mister ni Vice President Sara Duterte, sinabi ni Pangulong Bongbong Marcos na, kung mapatutunayan, maituturing ito na isang national security threat. Isa itong posibleng banta sa seguridad ng bansa.

Sa pagtestigo ng Anti-Money Laundering Council sa impeachment trial ni VP Sara, lumutang na 319 milyong piso ang pumasok sa naturang kompanya. Wala namang masama na makipagnegosyo sa mga dayuhan, pero ibang usapin na kung ganitong kalaki ang halagang pumasok sa negosyong may kaugnayan pa sa pangalawang pinakamataas na opisyal ng gobyerno. Hindi rin malayong kontrolado ng gobyerno ng China ang mga kompanyang nagpadala ng pera, at kung totoo nga ito, may potensyal na makaimpluwensya ito sa mga paninindigan at desisyon ng sangkot na opisyal. 

Binuweltahan ni VP Sara ang sinabi ni PBBM. Pinalalabas daw ng pangulo na “banta sa seguridad ng Pilipinas ang pakikipag-negosyo sa China.” Ang masama pa, “ang pahayag ay tahasang nag-aakusa sa China ng panghihimasok sa internal affairs ng Pilipinas.” Nababahala ang bise presidente na “magkaroon ito ng seryosong epekto sa ating relasyon sa China.” Ginatungan pa niya ito gamit ang isyu tungkol sa pagkakasabat ng bultu-bultong droga mula sa Laos at Thailand na dadalhin umano sa Pilipinas. Nagiging “troublemaker of Southeast Asia” na raw ang ating bansa—pasaway, pasimuno ng gulo, naghahanap ng away.

Ano kaya ang mararamdaman ng mga sundalo nating nagbabantay sa ating teritoryo sa West Philippine Sea? Ano kaya ang masasabi ng mga mangingisda nating laging itinataboy ng mga dayuhan sa karagatang pinagkukunan nila ng kabuhayan? Matatanggap ba nilang bahagi sila ng isang bansang tinatawag ni VP Sara na “troublemaker”? 

Napakahirap palabasing “troublemaker” ang Pilipinas, gayong tanggap naman nating wala tayong panamà o pantapat sa lakas ng puwersang militar ng China. Maliban noong administrasyon ng ama ng bise presidente, palagi tayong kumikiling sa mapayapa at diplomatikong pagresolba sa mga di-pagkakaintindihan ng mga opisyal ng Pilipinas at China. Idinadaan natin ito sa paghahain ng mga diplomatic protests, at pumapalag tayo gamit ang ebidensya at mahinahong pakikipag-argumento. Pero hindi tayo nananahimik lang o sumisipsip sa China para lang maiwasang matawag na “troublemaker.” Nakakawala ito ng dignidad bilang isang bayan. Pagbabalewala ito sa tamang proseso ng batas at pag-iral ng mga pandaigdigang kasunduan. Pagtatraydor ito sa ating mga kababayan. 

Pinahahalagahan sa mga panlipunang turo ng ating Simbahan ang pagiging tapat ng mga lingkod-bayan. Sa isang banda, dapat patas na imbestigahan ang mga akusasyon ng korapsyon at panghihimasok ng mga dayuhan sa ating pamahalaan; hindi dapat ito gamitin para mambato lang ng putik. Sa kabilang banda, dapat magpaliwanag ang mga namumuno sa gobyerno kapag meron silang conflicts of interest. Ito ang dapat nilang linawin sa publiko, hindi ang ibaling ang ating atensyon sa ibang isyu o pagbaluktot sa sinasabi ng mga itinuturing nilang kalaban sa pulitika. 

Samantala, tayo namang mga mamamayan ay dapat maging mapanuri sa mga sinasabi at ginagawa ng ating mga lider. Sa kanilang mga sinasabi, kaninong interes ang kanilang pinapanigan? Sa kanilang mga desisyong ginagawa, sino ang nakikinabang? O sa kanilang hindi diretsang pagsagot sa mga isyu, masasabi ba nating mahalaga sa kanila ang katotohanan? Sabi nga sa Juan 3:21, “ang namumuhay ayon sa katotohanan ay lumalapit sa ilaw.” Ang mga lider na may lehitimong paliwanag ay dapat tanggapin ang pagsusuri sa kanila sa halip na ituring na pag-atake ang bawat tanong. Hindi kailangang maging defensive.

Mga Kapanalig, sa pagpili natin ng ating mga lider, lagi nating itanong: nakanino ang kanilang katapatan?

Sumainyo ang katotohanan.

Hindi sapat ang balde

 53,443 total reads

Mga Kapanalig, bumili na raw tayo ng mga timba, balde, at iba pang imbakan ng tubig bilang paghahanda sa paparating na Super El Niño. Ito ang bilin ni Pangulong Bongbong Marcos Jr. Ang tubig daw na maiipon sa mga balde, maaaring maging malinis at ligtas inumin sa pamamagitan ng mga filtration kits na ipamamahagi ng gobyerno.

Ayon sa PAGASA, inaasahang lalakas pa ang El Niño bago matapos ang 2026, at posibleng magpatuloy ito hanggang sa unang bahagi ng 2027. Magdudulot ito ng kakulangan sa ulan at tagtuyot sa maraming bahagi ng bansa. Ang resulta: mas kaunting tubig na makararating sa ating mga tahanan.

Wala namang mali sa paalala ni PBBM, pero kung ito lang ang naiisip niyang solusyon para maibsan ang mga epekto ng El Niño, parang ipinapasa lang sa mga mamamayan ang responsabilidad sa pagharap sa krisis. Naghahanap ang taumbayan ng malinaw na plano para sa buong bansa, pero ang natanggap nila ay paalala na nagpapahiwatig na nakasalalay lang sa kanila ang solusyon. Ipinauubaya na sa mga mamamayan ang pag-iipon ng tubig at paglilinis nito; may ipamimigay naman daw na water filtration kits ang gobyerno. 

Lalo pang naging kontrobersyal ang usapin nang magkomento si Presidential Communications Office Undersecretary Claire Castro na kailangan ng mga kritiko ng “baldeng utak” upang maintindihan ang pahayag ng pangulo. Sa halip na ibsan ang pangamba ng publiko at ipaliwanag nang maayos ang mga hakbang ng pamahalaan, insulto pa ang natanggap ng mga naghahanap ng kasagutan.

Sa panahong pangamba sa hinaharap ang namamayani, hindi masisisi ang mga mamamayan na maghanap ng malinaw na gagawin ng pamahalaan dahil nasa mga kamay nito ang pondo at ito ang nagpapatupad ng mga patakarang tutugon sa ating mga pangangailangan. Kaunti na lang ang panahon para maghanda sa mga epekto ng matinding El Niño, kaya makatwirang asahan na gagawa ang pamahalaan ng mga hakbang na sila mismo, bilang mga lingkod-bayan, ang magsasakatuparan—higit sa pamimigay ng pansala ng tubig.

Sa sumunod na press conference, inilatag ni Usec Castro ang mga plano ng gobyerno. Aniya, naghahanap na ito ng alternatibong mapagkukunan ng tubig, dinadamihan na ang mga water treatment plants at water systems sa bansa, at muling pagaganahin ang mga balón upang madagdagan ang suplay. Kasama si DSWD Secretary Rex Gatchalian, ipinakita rin ni Usec Castro kung paano gamitin ang mga filtration kits na binanggit ng pangulo. Tiwala rin ang Metropolitan Waterworks and Sewerage System (o MWSS) na maiiwasan ang kakulangan sa tubig dahil naghahanda na ito mula pa noong 2022.

Kung ang mga hakbang na ito ang higit na binigyang-diin ng pangulo sa halip na ang payo tungkol sa mga balde, maaaring mas naunawaan ng publiko ang lawak ng paghahanda ng pamahalaan. 

Pero hindi sapat na tiyakin lamang na sapat ang suplay ng tubig. Kailangang ding may plano kung ano ang gagawin sa suplay. Kailangang maitukoy kung sino ang higit na mangangailangan ng tulong, ano ang kanilang kakailanganin, at paano at kailan ito dapat makarating sa kanila. Higit sa lahat, kailangang masigurong maisasakatuparan ang mga plano at matiyak na makararating sa mga mamamayan ang tulong kapag lubos nang nararamdaman ang mga epekto ng El Niño.

Mga Kapanalig, gaya ng paalala sa 1 Corinto 12:26, kapag nagdurusa ang isang bahagi, nagdurusa ang lahat. Sa diwa ng pagkakaisa, mahalagang gampanan natin ang ating responsabilidad bilang mga indibidwal at bahagi ng komunidad na magtipid at mag-ipon ng tubig bilang paghahanda sa Super El Niño. Pero higit sa pagkilos ng bawat isa, tungkulin din ng pamahalaan na maglatag at magpatupad ng malinaw at komprehensibong plano upang matiyak na walang maiiwan sa panahong higit na kailangan ang tulong.

Sumainyo ang katotohanan.