310 total views
Mahalaga ang ikatlong round ng usapang pangkapayapaan para matalakay ng mga kinatawan ng pamahalaan at National Democratic Front of the Philippines (NDFP) ang mga nauna ng kasunduang nilagdaan ng magkabilang panig.
Kaugnay nito, ayon kay Atty. Edre Olalia – President of Nation Union of People’s Lawyers at legal consultant ng NDFP Peace Panel dismayado pa rin ang NDFP sa pagkabigo ng pamahalaan na mapalaya ang nasa 200 bilanggo mula sa 434 na mga bilanggong pulitikal noong nakalipas na taon.
“Merong napipintong pangatlong round ng usapang pangkapayapaan na pormal sa darating na pangatlong linggo ng Enero pero ang pinaka-importanteng nangyari ngayon ay napako yung pangako ng gobyerno na sila ay magpapalaya ng 200 bilanggong pulitikal sa out of the 434 na dapat ay naipatupad na nila nitong Oktubre 27…” Ang bahagi ng pahayag ni Atty. Olalia sa panayam sa Radyo Veritas.
Samantala, matapos ang unang dalawang round ng peace talks na isinagawa ng Oslo, Norway noong 2016 nakatakda namang isagawa ang ikatlong round ng usapang pangkapayapaan mula ika-19 hanggang 25 ng Enero sa Roma, Italya.
Ito ay matapos ang nasa 15-taong pagkakaunsyami ng usapang pangkapayapaan sa ilalim ng Administrasyong Arroyo at Aquino.
Una ng binigyang diin ni Pope Francis na hindi kailanman makakamit ang kapayapaan sa pamamagitan ng pag-aarmas kundi sa isang payapang dayalogo.
