654 total reads
Ang Mabuting Balita, 22 Pebrero 2024 – Mateo 16: 13-19
TAYO ANG PIPILI
Noong panahong iyon, dumating si Jesus sa lupain ng Cesarea ng Filipos. Tinanong niya ang kanyang mga alagad, “Sino raw ang Anak ng Tao, ayon sa mga tao?” At sumagot sila, “Ang sabi po ng ilan ay si Juan Bautista kayo. Sabi naman ng iba, si Elias kayo. At may nagsasabi pang si Jeremias kayo o isa sa mga propeta.” “Kayo naman, ano ang sabi ninyo? Sino ako?” tanong niya sa kanila. Sumagot si Simon Pedro, “Kayo po ang Kristo, ang Anak ng Diyos na Buhay.” Sinabi sa kanya ni Jesus, “Mapalad ka, Simon na anak ni Jonas! Sapagkat ang katotohanang ito’y hindi inihayag sa iyo ng sinumang tao kundi ng aking Amang nasa langit. At sinasabi ko naman sa iyo, ikaw ay Pedro, at sa ibabaw ng batong ito ay itatayo ko ang aking simbahan, at hindi makapananaig sa kanya kahit ang kapangyarihan ng kamatayan. Ibibigay ko sa iyo ang mga susi ng kaharian ng langit: ang ipagbabawal mo sa lupa ay ipagbabawal sa langit, at ang ipahintulot mo sa lupa ay ipahihintulot sa langit.”
————
Hindi inintindi ni Jesus kung sino siya sa mga tao, ngunit inintindi niya kung sino siya sa kanyang mga alagad. Kailangan nilang malaman kung sino siya sapagkat bilang ang kanyang oras. Hindi nila siya makakapiling ng walang hanggan. Sa ganitong pananaw, mas maiintindihan nila ang kanyang mga gawain, ang kanyang mga turo at ang kanyang ugnayan sa Diyos Ama. Sa ganitong pananaw, maiintindihan nila na ang kapangyarihang ibibigay sa kanila ay nagmumula sa langit, kaya’t ang pagtatayo ng Simbahan ay hindi lamang para sa atin dito sa mundo, kundi ito ay konektado sa KAWALANG-HANGGAN.
Napakahalagang sagutin natin si Jesus kapag tinanong niya tayo: “Kayo naman, ano ang sabi ninyo? Sino ako?” sapagkat anuman ang gawin natin dito sa mundo ay konektado sa KAWALANG-HANGGAN: Buhay na Walang Hanggan o Kamatayang Walang Hanggan. TAYO ANG PIPILI.
Salamat, Panginoong Jesus, sa iyong dakilang sakripisyo ng kamatayan upang bigyan kami ng pagkakataong makapiling ka, ang Ama, ang Espiritu Santo, at lahat ng para sa iyo ay karapat-dapat, sa buhay na walang hanggan!
