26,936 total views
Tiniyak ng isang opisyal ng Catholic Bishops’ Conference of the Philippines (CBCP) ang aktibong pagtugon at pakikibahagi sa panawagan ni Pope Leo XIV na Day of Fasting and Prayer for Peace’ ngayong ika-22 ng Agosto 2025.
Ayon kay Caceres Archbishop Rex Andrew Alarcon chairman ng CBCP-Episcopal Commission on Youth, napapanahon ang panawagan ng Santo Papa na pagsasagawa ng isang ‘Araw ng Pag-aayuno at Panalangin para sa Kapayapaan’ kasabay ng paggunita ng Feast of the Queenship of Mary-Queen of Peace sa ika-22 ng Agosto.
Pagbabahagi ng Arsobispo, kaisa ng mga dumaranas ng mga pagdurusa dahil sa mga patuloy na nagaganap na armadong sagupaan sa iba’t ibang bansa ang Arkidiyosesis ng Caceres gayundin ang youth ministry ng CBCP sa pananalangin at pagsusumamo sa Panginoon upang mawakasan na ang patuloy na digmaang bumibiktima sa mga inosenteng mamamayan lalo’t higit ang mga bata at mahihina sa lipunan.
“We welcome the Holy Father’s call for fasting and prayer tomorrow, on the Feast of the Queenship of Mary-Queen of Peace. We stand in solidarity with our brothers and sisters, especially the young and the children, the innocent ones, who are victims of war, hatred and injustice.” Bahagi ng mensahe ni Archbishop Alarcon sa Radyo Veritas.
Partikular namang hinikayat ng Arsobispo ang mga kabataang Pilipino na makilahok sa isang ‘Araw ng Pag-aayuno at Panalangin para sa Kapayapaan’, hindi lamang para sa pandaigdigang kapayapaan kundi maging sa katiwasayan sa mismong tahanan, pamayanan at ng bansa.
Paliwanag ni Archbishop Alarcon, naniniwala ang Simbahan partikular na ang youth ministry ng CBCP sa kahalagahan ng pakikilahok ng mga kabataan sa mga katulad na gawain at mga usaping panlipunan na isang patunay ng pagmamalasakit sa kapwa at sa kinabukasan ng bansa.
“We fast and pray for peace in the world, and also in our own homes, community and country. We support this call for prayer and fasting, and especially ask our young people to be part of this endeavor. May we be united in prayer and action, and together let us beg and work for peace. As we sing: ‘Let there be peace on earth, and let it begin with me.’ And may the Peace which comes from Jesus, be ours.” Dagdag pa ni Archbishop Alarcon.
Pinaalalahanan naman ng Arsobispo ang lahat -na ang kapayapaan ay hindi lamang bunga ng panalangin kundi isang hamon para sa konkretong pagkilos ng bawat isa.
bahagi ng panawagan ni Pope Leo XIV ang paghikayat sa mga Katoliko na ialay ang araw ng pananalangin at pag-aayuno bilang paghingi ng awa ng Panginoon, gayundin upang ipapanawagan sa Diyos ang katarungan, kapayapaan, at kaginhawaan para sa mga nagdurusa dahil sa patuloy na armadong sagupaan sa iba’t ibang panig ng mundo.
Kabilang sa mga bansang may nagpapatuloy na armadong sagupaan na nagdudulot ng patuloy na matinding pagdurusa sa mga sibilyan hanggang sa kasalukuyan ang mga bansang Sudan, Myanmar, Democratic Republic of the Congo (DRC), Ethiopia, Ukraine, gayundin sa mga bansa sa Gitnang Silangan – partikular na sa Gaza, Syria, at Yemen.
