17,549 total views
Simula Nobyembre 2025, magkakaroon na ng regular na Banal na Misa sa wikang Koreano sa Holy Face Chapel ng Baguio Cathedral.
Batay sa sirkular na inilabas ni Baguio Bishop Rafael Cruz, D.D., layunin ng inisyatibong ito na maging tahanan ng pananampalataya ang simbahan para sa mga Koreanong Katoliko na nais magdiwang ng Eukaristiya sa kanilang sariling wika.
Ang Misa sa wikang Koreano ay gaganapin tuwing Sabado, ganap na alas-singko ng hapon, simula Nobyembre 2025, at ito ay pangungunahan ng mga Koreanong pari na itinalaga ng Diyosesis upang regular na mamuno sa Misa at magdiwang ng mga Sakramento.
Ayon kay Bishop Cruz, ang bagong iskedyul na ito ay isang paraan upang mas mapalapit ang simbahan sa mga mananampalataya anuman ang kanilang pinagmulan, at pagkakaisa sa loob ng Diyosesis.
“It is my sincere hope that this provision for Mass and the Sacraments in the Korean language will be a source of spiritual nourishment and strength for you during your stay here in the Diocese,” ayon pa kay Bishop Cruz.
Taong 2008, nang nagbukas ng misyon ang Korean Mission Society (KMS) sa ilalim ng Diocese of Baguio bilang tugon sa dumaraming bilang ng mga Koreanong Katoliko sa lungsod, karamihan ay mga mag-aaral sa iba’t ibang paaralan.
Ito ay sa pakikipag-guanayan na rin ng KMS sa Mission Society of the Philippines (MSP), na siyang opisyal na misyong sangay ng Simbahang Katolika ng Pilipinas.
Ang MSP ay aktibong naglilingkod sa limang kontinente at labintatlong bansa, kabilang ang Korea.
