164 total views
Nanawagan ng panalangin si Cubao Bishop Elias L. Ayuban, Jr., CMF para sa mga pamilyang biktima ng naganap na sunog sa isang komunidad sa kahabaan ng NIA Road sa Quezon City.
Ayon sa Obispo, mahalagang tulungan at ipanalangin ang mga pamilyang naapektuhan ng trahedya para sa kanilang muling pagbangon.
“Let us unite in prayer for the families affected by the fire along NIA Road. May the Lord console those who are suffering and guide the community as they begin the journey of healing and rebuilding,” pahayag ng obispo.
Personal na pinangunahan ni Bishop Ayuban ang pagbisita sa mga pamilyang naapektuhan ng sunog upang maghatid ng panalangin at pag-asa sa mga residenteng nawalan ng tahanan.
Sa kasalukuyan, pansamantalang nanunuluyan ang ilang evacuees sa San Isidro Labrador Parish, kung saan binuksan ng parokya ang mga pasilidad nito upang matulungan ang mga pamilyang lumikas mula sa nasunog na lugar.
Sa kanyang pagbisita sa lugar, nakipagpulong si Bishop Ayuban sa mga residente at tiniyak ang pakikiisa at panalangin ng Simbahan sa kanilang pinagdaraanan.
Ayon sa ulat, agad na binuksan ni Fr. Marti Espenido, kura paroko ng San Isidro Labrador Parish, ang Simbahan upang magsilbing pansamantalang kanlungan ng mga naapektuhan at patuloy na nakikipag-ugnayan upang matugunan ang kanilang pangangailangan.
Nakibahagi rin sa relief operations at pamamahagi ng tulong ang iba pang mga pari ng diyosesis, na pinangunahan nina Fr. Dennis Soriano at Fr. Ronnie Santos sa pamamagitan ng Social Services and Development Ministry ng Diyosesis ng Cubao.
Kasama din ni Bishop Ayuban sa kanyang pagbisita sa mga naapektuhang residente sina Fr. Marti Espenido at Fr. Julius Callanga, Chancellor ng diyosesis.
Sa kabila ng matinding pinsala sa komunidad, ibinahagi naman ng ilang residente na sa kabila ng naganap na malaking sunog sa lugar ay nanatiling buo at hindi naapektuhan ng apoy ang isang maliit na kapilya sa komunidad, maging ang mga puting lasong nakapalibot dito, na sumisimbolo sa paninindigan ng komunidad laban sa korapsyon sa pamahalaan.
