8,151 total reads
Nagpahayag ng panalangin at pakikiisa ang Diyosesis ng Legazpi kay Bayombong Bishop Jose Elmer Mangalinao, gayundin sa mga pari, relihiyoso, at mga layko ng Diyosesis ng Bayombong, kasunod ng pagkakasangkot ng Obispo sa kasong sibil kaugnay ng kanyang pastoral na pagsuporta sa mga komunidad na tumututol sa mga aktibidad ng pagmimina sa Nueva Vizcaya.
Sa inilabas na Statement of Solidarity ng Diyosesis ng Legazpi, binigyang diin nito ang kanilang pakikiisa sa misyon ng Simbahan na ipahayag ang Mabuting Balita, itaguyod ang dignidad ng bawat tao, at pangalagaan ang sangnilikha na ipinagkatiwala ng Diyos sa sangkatauhan.
“The Diocese of Legazpi expresses its prayerful solidarity with Most Rev. Jose Elmer I. Mangalinao, D.D., and the clergy, religious, and lay faithful of the Diocese of Bayombong following the filing of a civil case related to Bishop Mangalinao’s pastoral accompaniment of communities opposing mining activities in Nueva Vizcaya.” Bahagi ng pahayag ng Diyosesis ng Legazpi.
Ayon sa Diyosesis ng Legazpi, bilang mga tagasunod ni Kristo, nananatiling matatag ang Simbahan sa tungkulin nitong maging mabuting katiwala ng kalikasan at maging kaagapay ng mga pamayanang ipinagkakatiwala sa pastoral na pangangalaga nito.
Iginiit din ng diyosesis na ang pananagutang ito na isinabuhay ni St. Francis of Assisi, ay isang paanyaya upang maging mabubuting katiwala ng sangnilikha at mahabaging tagapaglingkod sa kapwa ang bawat isa.
“As disciples of Christ, we remain steadfast in our shared mission to proclaim the Gospel, uphold the dignity of every human person, and faithfully care for our common home, which God has entrusted to us. This responsibility, exemplified by St. Francis of Assisi, calls us to be good stewards of creation and compassionate companions of those entrusted to our pastoral care.” Dagdag pa ng Diyosesis ng Legazpi.
Kasabay nito, nanawagan din ang Diyosesis ng Legazpi ng panalangin upang manaig ang katotohanan, katarungan, at kapayapaan, at upang ang lahat ng sangkot sa usapin ay magabayan ng karunungan, pagiging makatarungan, at paggalang sa batas.
“We likewise pray that truth, justice, and peace may prevail, and that all those involved may be guided by wisdom, fairness, and respect for the rule of law.” Ayon pa sa Diyosesis ng Legazpi.
Samantala, hiniling din ng diyosesis ang pamamagitan ng Mahal na Ina ng Kaligtasan upang patuloy na palakasin ng Panginoon ang lahat ng naglilingkod para sa kapakanan ng sambayanan at sa pangangalaga ng Kanyang nilikha.
