11,885 total reads
Inaanyayahan ng Archdiocesan Commission on Youth (ACY) ng Archdiocese of Manila ang mga kabataan, parokya, paaralan, at iba pang youth organizations na makibahagi sa ika-41 World Youth Day (WYD) na gaganapin sa Seoul, South Korea mula August 3 hanggang 9, 2027.
Ayon kay ACY Minister Fr. Marthy Marcelo, binigyang-diin nito na ang World Youth Day ay higit pa sa isang pandaigdigang pagtitipon ng mga kabataan sapagkat ito rin ay paraan ng pakikipagtagpo kay Hesus sa kapwa sa kabila ng pagkakaiba-iba ng mga delegado.
“World Youth Day is far more than an international gathering. It is a powerful encounter with the living Christ, a pilgrimage that brings together millions of young people from every nation, culture, and language to celebrate the beauty of our Catholic faith and the vitality of the Church,” ayon kay Fr. Marcelo.
Paliwanag ng pari na nagsisilbing pagkakataon ang WYD upang maranasan ng mga kabataan ang pagiging bahagi ng pandaigdigang Simbahan at higit na mapalalim ang kanilang pananampalataya.
“It is a moment when young people realize that they are not alone in their faith journey but are part of a vibrant and universal Church united in Christ,” aniya.
Binigyang-diin din ng ACY na sa paglipas ng panahon ay nakapagbigay ang World Youth Day ng inspirasyon sa maraming kabataan upang tahakin ang bokasyon sa pagpapari at buhay relihiyoso, mapalalim ang pananampalataya, at maging mga lider na naglilingkod sa Simbahan at sa lipunan.
Bubuksan ng ACY ang pre-registration para sa mga nagnanais na lumahok sa opisyal na delegasyon ng arkidiyosesis mula June 25 hanggang July 31, 2026.
Sinabi ni Fr. Marcelo na ang proseso ng aplikasyon ay sasailalim sa panayam at masusing pag-aaral upang matiyak ang aktibong pakikilahok ng mga kandidato sa kanilang mga parokya, paaralan, bikaryato, at iba pang gawaing pangkabataan.
“Through this process, we hope to form a delegation that will faithfully represent the Archdiocese of Manila and serve as ambassadors of our local Church to the world,” ani Fr. Marcelo.
Bukod sa mismong World Youth Day, hinihikayat din ng ACY ang mga delegado na lumahok sa buong programa, kabilang ang “Days in the Dioceses” mula July 29 hanggang August 2, 2027, at “Days of Repose” mula August 10 hanggang August 12, 2027.
Ibinahagi ng pari na ang “Days in the Dioceses” ay magbibigay ng pagkakataon sa mga kabataang peregrino na makisalamuha sa mga lokal na komunidad sa Korea, makibahagi sa pagpapalitan ng kultura, at masaksihan ang yaman at pagkakaiba-iba ng pandaigdigang Simbahan.
Sinabi rin ng ACY ang dalawang pilgrimage package na inihanda para sa mga kalahok, subalit mariing hinihikayat ng komisyon ang pagpili sa buong World Youth Day Experience upang lubos na maranasan ang paglalakbay ng pananampalataya at pakikipag-ugnayan sa mga lokal na diyosesis.
Hinimok ni Fr. Marcelo ang mga pari, mga tagapagturo, at mga lider ng Simbahan na suportahan ang pakikilahok ng mga kabataan sa pandaigdigang pagtitipon.
“Your support and encouragement can help a young person encounter Christ in a profound way, discover his or her vocation, and embrace a deeper commitment to the mission of the Church,” ani Fr. Marcelo.
Ang tema ng World Youth Day Seoul 2027 ay hango sa Ebanghelyo ni San Juan 16:33: “Take courage! I have overcome the world.” Ito ang magiging unang World Youth Day sa South Korea at inaasahang dadaluhan ito ng milyun-milyong kabataang Katoliko mula sa iba’t ibang panig ng mundo.
