6,301 total reads
Nakikiisa ang social justice at advocacy arm ng Catholic Bishops’ Conference of the Philippines (CBCP) sa Diyosesis ng Bayombong at mamamayan ng Kasibu, Nueva Vizcaya sa gitna ng patuloy na pagtutol sa mga operasyon ng pagmimina sa lugar.
Binigyang-diin ni San Carlos Bishop Gerardo Alminaza, chairman ng CBCP Episcopal Commission on Social Action, Justice and Peace at pangulo ng Caritas Philippines, na kaisa ng Simbahan ang mga katutubo, magsasaka at pamilyang umaasa sa kabundukan, kagubatan, ilog at watershed ng lalawigan.
Ayon sa obispo, hindi pulitika ang ugat ng kanilang pakikiisa kundi ang misyon ng Simbahan na samahan ang mga komunidad na madalas hindi naririnig sa mga usaping may kinalaman sa lupa, tubig at likas na yaman.
“The Church stands with these communities because they bear the greatest risks when watersheds are degraded, rivers are polluted, forests are diminished, and ancestral domains are threatened. When the environment is harmed, it is often the poor who suffer first and suffer most. The cry of the poor and the cry of the earth are inseparable,” pahayag ni Bishop Alminaza.
Binigyang-diin din ni Bishop Alminaza na ang usapin sa Kasibu ay hindi lamang tungkol sa pangangalaga sa kapaligiran kundi maging sa dignidad ng tao, seguridad sa pagkain, karapatan ng mga katutubo at kinabukasan ng susunod na henerasyon.
Ipinagtanggol ng opisyal ng CBCP si Bayombong Bishop Jose Elmer Mangalinao, na aniya’y ginagampanan lamang ang pastoral na tungkulin ng Simbahan sa pagsama sa mga komunidad na nangangamba sa posibleng epekto ng pagmimina sa kanilang kapaligiran, kabuhayan, at mga lupaing ninuno.
Iginiit ng obispo na hindi dapat ikatakot ng mga mamamayan ang pagpapahayag ng kanilang mga lehitimong alalahanin kaugnay ng mga proyektong nakaaapekto sa kanilang kapaligiran at kinabukasan.
“The Church cannot remain neutral when the welfare of communities, the integrity of creation, and the future of coming generations are at stake. To accompany those who seek to protect life, land, water, and dignity is not a political choice. It is a Gospel imperative,” giit ni Bishop Alminaza.
Muli namang tiniyak ng Caritas Philippines at ng CBCP-ECSAJP ang suporta kay Bishop Mangalinao at sa mga komunidad ng Kasibu na nagsusulong ng pangangalaga sa kalikasan at mga lupaing ninuno sa pamamagitan ng mapayapa at legal na pamamaraan.
“We stand with the people of Kasibu. We stand with Bishop Jose Elmer Mangalinao. And we renew our commitment to care for our common home and to uphold the dignity of every person entrusted to our care,” saad ni Bishop Alminaza.
