250 total views
Itinanghal sa Department of Justice (DOJ) ang Lakbay Museo ng Paghilom at Teatro ng Paghilom bilang paggunita sa ika-10 anibersaryo ng Program Paghilom at isang dekada mula nang magsimula ang kampanya kontra droga sa ilalim ng nakalipas na administrasyong Duterte.
Isinagawa ang pagtatanghal noong June 30, 2026 sa ilalim ng temang “Isang Dekada ng Sama-samang Pag-alala.” na dinaluhan nina 2025 Ramon Magsaysay Awardee Rev. Fr. Flaviano Antonio “Flavie” Villanueva, SVD na siya ring Founder at President ng AJ Kalinga Foundation at Program Paghilom, at mga opisyal at kawani ng DOJ, gayundin ang mga pamilya ng mga biktima, kinatawan ng civil society organizations, legal community, mga lider ng simbahan, estudyante, at iba pang panauhin.
Ayon sa Program Paghilom, naging mahalagang pagkakataon ang pagdaraos ng programa sa pangunahing institusyon ng katarungan sa bansa upang higit na maisulong ang panawagan para sa katotohanan, pananagutan, restorative justice, at paghilom ng mga pamilyang naapektuhan ng kampanya kontra droga.
“Held at the country’s principal justice institution, the event underscored the continuing call for truth, accountability, restorative justice, and healing. For many families of victims, the Department of Justice has long represented their pursuit of justice. Through this gathering, the venue became a space for remembrance, dialogue, and solidarity.” Bahagi ng pahayag ng Program Paghilom.
Tampok sa Teatro ng Paghilom ang mga salaysay ng mga biyuda, ulila, at iba pang survivor na ibinahagi ang kanilang mga personal na karanasan sa panahon ng anti-drug campaign.
Ibinahagi rin sa pagtatanghal ang naging epekto ng libu-libong pagkamatay sa mga pamilya at komunidad, gayundin ang patuloy na pagtataguyod sa dignidad ng mga biktima.
Itinampok naman sa Lakbay Museo ng Paghilom ang mga larawan, personal na gamit, dokumentadong testimonya, at iba pang mga materyal na nagsasalaysay sa naging epekto ng kampanya kontra droga sa mga naapektuhang pamilya at pamayanan.
Ayon sa Program Paghilom, nagsisilbing memorial at educational platform ang traveling exhibit upang hikayatin ang mas malalim na pagninilay ng publiko sa kahalagahan ng paggalang sa dignidad ng tao, pananagutan, at pangangalaga sa karapatang pantao.
“The traveling exhibit continues to serve as a memorial and educational platform, encouraging public reflection on human dignity, accountability, and the importance of safeguarding human rights.” Dagdag pa ng Program Paghilom.
Kasabay ng pagdiriwang ng ika-10 anibersaryo ng patuloy na misyon ng Program Paghilom na samahan ang mga pamilya ng mga biktima at panatilihing buhay sa kolektibong alaala ng bansa ang kanilang mga kuwento, ay binigyang diin din ng Program Paghilom na ang pag-alala ay mahalagang hakbang upang hindi na maulit ang karahasan at upang maisulong ang katotohanan, katarungan, at tunay na paghilom.
