143 total views
Patuloy na isinusulong ng Philippine Jesuit Prison Service Foundation (PJPS) ang misyon ng pakikinig, paghilom, at pagpapanumbalik ng dignidad ng mga Persons Deprived of Liberty (PDLs) sa pamamagitan ng programang “Kwentuhang Bilibid: Listening, Learning, and Walking Together.”
Isinagawa noong June 27, 2026 sa Medium Prison Camp ng New Bilibid Prison ang programa na dinaluhan ng mga nagnanais maging volunteer ng PJPS, bilang pagkakataong mas maunawaan ang kalagayan ng mga nakakulong at makasama sila sa isang makabuluhang dayalogo.
Ayon sa PJPS, higit pa sa isang immersion activity ang Kwentuhang Bilibid sapagkat layunin nitong hikayatin ang mga kalahok na makita ang bawat tao nang higit sa kanilang pagkakamali at pakinggan ang kanilang mga kuwento nang may malasakit at paggalang.
“Kwentuhang Bilibid is more than an immersion activity. It is an invitation to encounter people beyond labels and beyond assumptions. It reminds us that every individual carries a story that deserves to be heard with compassion and respect.” Bahagi ng mensahe ng PJPS.
Sa mga naganap talakayan, nagkaroon ng pagkakataon ang mga volunteer, Persons Deprived of Liberty, Children in Conflict with the Law, at mga beteranong PJPS volunteers na magbahagi ng kani-kanilang karanasan at pagnilayan ang kahalagahan ng presensya at pakikinig bilang simula ng tunay na pag-akay.
Binigyang-diin din ng organisasyon na ang pag-asa ay hindi kailanman nakukulong at ang dignidad ng bawat tao ay nananatiling kaloob ng Diyos anuman ang kanilang nakaraan.
“Every conversation inside prison walls becomes a quiet reminder that hope is never imprisoned. Human dignity cannot be erased by past mistakes. Compassion has the power to restore relationships. Love continues to find its way into places where many believe it no longer exists.” Dagdag pa ng PJPS.
Lumahok sa gawain ang humigit-kumulang 120 Persons Deprived of Liberty na kasalukuyang naka-enrol sa iba’t ibang programang pang-edukasyon, kabilang ang Alternative Learning System (ALS), Muntinlupa National High School Extension, University of Perpetual Help System DALTA Extension, Vocational Training School, at programa para sa Children in Conflict with the Law.
Malugod namang tinanggap ng mga opisyal ng Bureau of Corrections ang gawain, bilang pagpapakita ng suporta sa mga programa para sa rehabilitasyon, edukasyon, restorative justice, at muling pagbibigay ng pagkakataon sa mga nasa loob ng piitan.
Nagpasalamat din ang PJPS sa Loaves and Fish Foundation sa pagsuporta sa programa sa pamamagitan ng pagbibigay ng pagkain sa mga kalahok, bilang pagpapakita ng diwa ng pagkakaisa at malasakit.
Patuloy namang inaanyayahan ng Philippine Jesuit Prison Service ang publiko na maging kabahagi ng kanilang misyon ng pakikinig, paghilom, at pagpapanumbalik ng pag-asa sa buhay ng mga taong apektado ng pagkakabilanggo.
