301 total views
Kinundena ng Alliance of Contractual Employees in UP ang pamunuan ng University of the Philippines-Diliman sa bagong “anti-manggagawa” na kontrata.
Bilang pagtutol, nagsagawa ng kilos-protesta sa Quezon Hall ng UP sa Diliman, Quezon City ang ACE-UP, at pinunit ng mga kawaning kontraktwal at mga kaalyadong organisasyon ang itinuturing nilang anti-manggagawa na kontrata.
Iginiit ng ACE-UP na ang bagong kontrata ay naglalaman ng mga arbitraryo at makaisang-panig sa interes ng UP na lumalabag sa batayang karapatan ng mga kawaning kontraktwal.
Binigyan-diin ng ACE-UP na hindi makatao ang kontrata, walang proteksyon sa kanilang karapatan at walang kaakibat na benepisyo.
Nanawagan ang grupo kay pangulong Ferdinand Marcos Jr., at sa pamunuan ng UP na ibasura ang hindi makataong kontrata, wakasan na ang kontraktwalisasyon at buuin TWG on contractualization.
Kinuwestiyon ng ACE-UP ang OVPA Memorandum No. ACR 26-100 na epektibo mula JULY 01, 2026 hanggang DECEMBER 31, 2026 para sa mga kawaning COS kung saan ang kontrata na dating 3-pages ay naging 19-pages na walang konsultasyon at panahon na aralin ng mga apektadong manggagawa.
Tinuligsa din ng grupo ang mabilisan at puwersahang pagpapatupad ng hindi makataong kontrata ngUP-Accounting Department sa pamamagitan ng announcement na “no contract, no start of work”.
Ayon sa ACE-UP, hindi consistent ang provision ng kontrata sa mga nilalaman ng annexes kung saan makakasahod lamang ang mga kawaning contraktwal kung “payment shall be subject to the satisfactory completion, submission, review and acceptance of required deliverables”.
Inihayag ng grupo ang malinaw na paulit-ulit na pang-aabuso at kawalan ng seguridad sa trabaho ang umiiral sa contractualization na mismong ang pamahalaan ang nagtataguyod.
Naninindigan ang ACE-UP na patuloy ang kanilang laban para sa regularisasyon at tuluyan ng alisin ng UP ang contractualization system.
