6,211 total views
Nanindigan ang Ecumenical Institute for Labor Education and Research o EILER na hindi sapat ang ipatutupad na 85-pesos na dagdag-sahod sa minimum wage earners sa National Capital Region o NCR.
Iginiit ng EILER na bagamat ito ang pinakamataas na wage increase sa kasaysayan ay nananatili pa rin itong malayo sa antas ng nakabubuhay na suweldo sa gitna ng patuloy na pagtaas ng presyo ng pagkain, pamasahe, langis, at iba pang pangunahing bilihin o serbisyo.
Ayon kay EILER Executive Director Rochelle Porras, hindi nangangahulugan na makabuluhan ang pagtaas ng minimum wage kung hindi naman ito umaabot sa antas na sapat upang matugunan ang pang-araw-araw na pangangailangan ng mga manggagawa at kanilang pamilya na apektado ng patuloy na pagtaas ng inflation at mataas na presyo ng mga bilihin.
““Sa kabila ng patuloy na pagtaas ng NCR labor productivity simula 2000, bumaba ang tunay na halaga ng sahod sa NCR. Kung kaya naman walang signipikanteng pagtaas sa loob ng dalawampung taon,” ayon sa mensahe ni Porras.
Ipinaliwanag ng EILER na ang kasalukuyang average minimum wage sa bansa ay malayo pa rin sa P1,305 Family Living Wage para sa pamilyang may limang miyembro.
Sa NCR naman kahit umabot na sa 780-pesos ang arawang minimum wage ay malaki pa rin ang agwat nito sa tinatayang P1,279 Family Living Wage.
Binatikos din ng EILER ang 2-beses na pagpapatupad ng dagdag-sahod kung saan 60-pesos ang ipatutupad sa ika-19 ng Hulyo 2026 habang ang nalalabing 25-pesos ay sa January 2027 pa ipapatupad.
“Kaisa ang mga manggagawa, patuloy nating igigiit ang karapatan sa nakabubuhay na sahod, seguridad sa trabaho, at isang ekonomiyang tunay na nakabatay sa kapakanan ng mamamayan at hindi sa interes ng iilan, “ bahagi pa ng mensahe ni Porras sa EILER.
Patuloy namang isinusulong ng Simbahang Katolika ang pagtataguyod sa dignidad ng paggawa at makatarungang pasahod at mga polisiyang magbibigay ng sapat na kabuhayan at digdinad sa mga manggagawa.
