23,343 total reads
Hinihikayat ni Legazpi Bishop Joel Baylon ang mga kabataan na makilahok sa nakatakdang ika-43 Diocesan Youth Marian Pilgrimage (DYMP) sa Oktubre 3, 2026.
Sa inilabas na sirkular ni Bishop Baylon noong Agosto 19, 2026 ay inihayag ng Obispo ang tema ng gawain na “Young Hearts Aflame Like Mary, Blessed, Nurtured, and Sent Forth.”
Hinikayat ni Bishop Baylon ang mga kabataan na makilahok bilang mga “Missionary Pilgrims,” at bilang pasasalamat na rin sa 75 taon ng katapatan ng Diyos sa Diocese of Legazpi, kasabay ng paggunita sa 250 taong debosyon sa Our Lady of Salvation.
Ayon sa Obispo ang pagiging “Missionary Pilgrims” ay isang paanyaya sa mga kabataan na hindi lamang maglakbay patungo sa dambana, kundi maging mga saksi ng pananampalataya at pag-asa sa kanilang mga pamayanan.
“We encourage our youth to participate wholeheartedly in this pilgrimage as Missionary Pilgrims, giving thanks for seventy-five years of God’s faithfulness to our Diocese and celebrating two hundred fifty years of devotion to Our Lady of Salvation.” Bahagi ng panawagan ni Bishop Baylon.
Bahagi rin ang taunang pilgrimage ng Celebratory Phase ng Diamond Jubilee ng Diocese of Legazpi, na naglalayong tulungan ang kabataan na higit na mapalalim ang kanilang pananampalataya, pag-ibig kay Maria, at pagtugon sa misyon ng Simbahan bilang mga kabataang misyonero.
“This annual expression of youth Marian devotion forms part of the Celebratory Phase of our Diocesan Diamond Jubilee, offering our young people a grace-filled opportunity to renew their faith, deepen their love for Mary, and embrace more fully the mission of the Church.” Dagdag pa ni Bishop Baylon.
Nakatakda ang ika-43 Diocesan Youth Marian Pilgrimage (DYMP) sa Oktubre 3, 2026, mula alas-4:00 ng madaling-araw hanggang ala-1:00 ng hapon.
Kabilang sa mga gawain ang sabayang kumpisal, vocation promotion, Poems for Ina at Harana ki Ina, bago ang Banal na Misa sa ganap na alas-10:00 ng umaga.
Magsisimula ang pilgrimage sa St. Carlo Acutis Quasi-Parish sa Barangay Naga, Tiwi, at magtatapos sa Parish and Diocesan Shrine of Our Lady of Salvation sa Barangay Joroan kung saan dadaan ang mga kabataan sa Sogod, Lourdes at Bariis.
