13,422 total reads
Nanawagan si San Carlos Bishop Gerardo Alminaza ng katarungan para sa journalist na si RJ Nichole Ledesma, kasabay ng paglulunsad ng #JusticeforRJLedesma campaign noong Agosto 30, 2026 na nataon rin sa paggunita ng National Press Freedom Day at ika-31 kaarawan ng yumaong mamamahayag.
Sa kanyang mensahe sa Altermidya, binigyang-diin ni Bishop Alminaza na siya ring chairman ng CBCP-Episcopal Commission on Social Action, Justice, and Peace na hindi makakamit ang tunay na kapayapaan kung walang katarungan, paggalang sa karapatang pantao, at pangangalaga sa kalikasan.
“For us, there can never be real peace, authentic peace, without justice, without respect for human rights, as well as care for the environment.” Bahagi ng mensahe ni Bishop Alminaza.
Ayon sa Obispo, partikular na mahalaga ito para sa mga taga-Negros, kasunod ng insidente sa Toboso kung saan kabilang si Ledesma sa 19 na indibidwal na nasawi.
Inilarawan ni Bishop Alminaza si Ledesma bilang isang marangal na mamamahayag na naging katuwang ng komunidad sa pagtataguyod ng pangangalaga sa kalikasan at karapatang pantao sa lugar.
“Nakakabahala kasi isa siyang marangal na journalist, kasama namin sa pag-protect ng environment and also to promote human rights.” Dagdag pa ni Bishop Alminaza.
Sa paggunita kay Ledesma, hinimok din ng Obispo ang publiko na huwag kalimutan ang sinapit ng mamamahayag at ang kanyang naging ambag sa komunidad.
“Kaya ginugunita natin ngayon ‘yung nangyari kay RJ Ledesma at pinapasalamatan din natin siya dahil sa kanyang nagawa, at sana naman hindi natin makalimutan ang nangyari sa kanya.” Ayon pa kay Bishop Alminaza.
Samantala, binigyang-diin din ni Bishop Alminaza na ang panawagan para sa katarungan ay hindi lamang para kay Ledesma kundi bahagi rin ng paghahangad ng tunay at pangmatagalang kapayapaan sa buong bansa.
“Nananawagan tayo ng justice for RJ kasi kung walang hustisya, wala ring tunay na kapayapaan.” Ani Bishop Alminaza.
Sa harap ng patuloy na mga hamon sa karapatang pantao, kalayaan sa pamamahayag at pangangalaga sa kalikasan, iginiit din ni Bishop Alminaza na ang pagkamit ng kapayapaan ay nangangailangan ng sama-samang pagkilos para sa katarungan at dignidad ng bawat tao
