1,531 total reads
Inaanyayahan ng National Shrine of Our Lady of Fatima sa Valenzuela City ang mga deboto at peregrino na dumalo sa Diocesan Fatima Conference sa September 13, kasabay ng paggunita sa anibersaryo ng ikalimang aparisyon ng Mahal na Birhen ng Fatima.
Layunin ng pagtitipon na palalimin ang pag-unawa ng mga deboto sa mensahe ng Fatima bilang bahagi ng kanilang espirituwal na paglago.
“The conference intends to deepen the understanding of the Fatima message among the devotees of Our Lady of Fatima; thus, contributing to their spiritual growth.”
Nilalayon din ng pagpupulong na itaguyod ang makabuluhang ugnayan sa buhay at misyon ng simbahan sa pamamagitan ng mga paghuhubog sa mga mananampalataya.
Gayundin ang paghikayat sa pagkakaroon ng pilgrimage sa pambansang dambana na itinalaga sa Birhen ng Fatima.
Magsisimula ang programa alas 12:30 ng tanghali sa pagdating ng mga kalahok, susundan ng pagdarasal ng Santo Rosaryo alas-1 ng hapon at welcome message ni Fr. Elmer Ignacio, rector ng national shrine.
Alas-1:45 naman ang unang talakayan na pangungunahan ni Fr. Raymond Joseph Arre, sa paksang “Marian Apparitions: Call to Penance and Conversion,” habang alas-2:45 ang ikalawang talakayan ni Fr. Julius De Sagun, na tatalakay naman sa paksang “The Children of Fatima: Models of Faith and Spiritual Reparation.”
Alas-4 ng hapon ang Exposition of the Blessed Sacrament at Chaplet of the Angel of Peace, bago ang pagdiriwang ng banal na misa sa alas-5 ng hapon na pangungunahan ni Cubao Bishop Elias Ayuban, Jr., at kasalukuyang apostolic administrator Diocese of Parañaque, kasama si Malolos Bishop Dennis Villarojo, na siya namang national spiritual director ng World Apostolate of Fatima Philippines.
Susundan ang Banal na Misa ng maringal na prusisyon ng National Pilgrim Image of Our Lady of Fatima sa loob ng Shrine.
Inaanyayahan ang mga lider at miyembro ng World Apostolate of Fatima, mga kasapi ng Marian associations, mga parokyano, deboto at mga peregrino na dumalo sa marian conference.
