10,966 total reads
Inihayag ng Archdiocese of Manila ang pagdaraos ng Second Manila Archdiocesan Marian Congress sa Oktubre 10, 2026 sa National Shrine and Parish of Our Lady of Loreto sa Sampaloc, Manila.
Ayon sa RCAM Circular No. 2026-81 na inilabas noong Agosto 31, 2026 gaganapin ang Marian Congress mula alas-6:30 ng umaga hanggang ala-1:30 ng hapon sa loob ng shrine compound.
Tema ng Second Manila Archdiocesan Marian Congress “Ang Mahal na Birheng Maria, Ina ng Simbahang Sinodal: Hubog, Buklod, Lingkod,” na layuning ipakilala ang Mahal na Birheng Maria bilang Ina at kapwa Pilgrim ng Simbahan na kasama ng Sambayanan ng Diyos sa paglalakbay tungo sa synodality.
Nakaugat ang tema sa naging Manila Archdiocesan Ecclesial Assembly (MAEA) na bibigyang-diin ang papel ni Maria sa paghubog ng pananampalataya, pagbubuklod ng komunidad, at paglilingkod sa kapwa.
“This year’s theme, “Ang Mahal na Birheng Maria, Ina ng Simbahang Sinodal: Hubog, Buklod, Lingkod,” is a response to the recent Manila Archdiocesan Ecclesial Assembly (MAEA). The congress seeks to present the Blessed Virgin Mary as both Mother and fellow Pilgrim of the Church, accompanying the People of God in the journey of synodality through formation, unity, and service.” Bahagi ng sirkular ng Arkidiyosesis ng Maynila.
Tampok sa nakatakdang Second Manila Archdiocesan Marian Congress ang dalawang pangunahing sesyon kung saan tatalakayin ni Rev. Msgr. Pedro Gerardo O. Santos, parish priest ng St. Andrew the Apostle Parish sa Bel-Air, Makati, ang “Ang Mahal na Birheng Maria, Ina ng Simbahang Sinodal: Hubog, Buklod, Lingkod.”
Samantala, tatalakayin naman ni Rev. Msgr. Reginald Malicdem, Vicar General at Moderator Curiae ng Archdiocese of Manila, ang “Maria, Salamin ng Katwiran: Ang Pakiklakbay ng Mahal na Birhen sa mga Usaping Panlipunan ng Ating Bayan.”
Magkakaroon din ng concurrent sessions na maaaring pagpilian ng mga kalahok, kabilang ang “Si Maria sa Tahanan ng Nazaret – Hubog,” na pangungunahan ni Rev. Fr. Cristino Pine, OFM; “Si Maria noong Araw ng Pentecostes – Buklod,” ni Dr. Victoria N. Apuan; at “Si Maria sa Kasalan ng Cana – Lingkod,” ni Rev. Fr. Roberto Titco.
Inaanyayahan ng Archdiocese of Manila ang mga pari, communities of consecrated life, at lay faithful na makiisa sa Second Manila Archdiocesan Marian Congress bilang bahagi ng patuloy na paglalakbay ng Simbahan tungo sa mas malalim na communion, participation, at mission.
Para sa mga katanungan at karagdagang impormasyon para sa nakatakdang gawain, maaaring makipag-ugnayan sa Parish Office ng National Shrine and Parish of Our Lady of Loreto.
