807 total reads
Nagpahayag ng buong suporta ang Caritas Philippines sa Dapat Isa Lang People’s Initiative na naglalayong wakasan ang political dynasties sa bansa.
Sa pahayag na inilabas noong Setyembre 30, 2026 sa Urdaneta City, ipinahayag ni Caritas Philippines President, San Carlos Bishop Gerardo Alminaza ang suporta at pakikiisa sa panawagan ni Catholic Bishops’ Conference of the Philippines (CBCP) President, Lipa Archbishop Gilbert Garcera sa pastoral statement na inilabas ng CBCP noong Setyembre 25, 2026 para sa pagpapatupad ng isang “genuine, meaningful, and effective” Anti-Political Dynasty Law, kasabay ng pagsuporta sa Dapat Isa Lang People’s Initiative bilang isang mapayapa, legal at demokratikong hakbang ng mga mamamayan.
“In the name of Archbishop Gilbert Garcera, President of the Catholic Bishops’ Conference of the Philippines and Archbishop of Lipa, and in my capacity as President of Caritas Philippines, together with Fr. Tito Caluag, Executive Director of Caritas Philippines, I declare our full support for the Dapat Isa Lang People’s Initiative to end political dynasties.” Bahagi ng pahayag ni Bishop Alminza.
Ginawa ni Bishop Alminza ang pahayag sa Panpacific University Events Center sa Urdaneta City, kung saan naroon din ang mga kinatawan ng 13 archdioceses, dioceses at apostolic vicariates na kabilang sa Northern Luzon Social Action Network.
Ayon sa Caritas Philippines, ang People’s Initiative ay nakaugat sa panawagan para sa pakikilahok ng mamamayan at sa pananampalataya at malasakit sa bayan at sa common home.
“This People’s Initiative is an expression of people power, inspired by our faith in God and our concern for our country and our common home.” Dagdag pa ni Bishop Alminaza.
Samantala hinikayat din ni Bishop Alminaza ang mga Pilipino na magkaisa sa usapin ng pagpapalawig sa usapin ng pamamahala at pananagutan sa pamahalaan.
“Mga mahal kong kapatid, kapwa Pilipino: magkaisa tayo. Dapat Isa Lang!” Ayon pa kay Bishop Alminaza.
Ang pahayag ng Caritas Philippines ay bahagi rin ng patuloy na pakikilahok ng social action network ng Simbahan sa mga usaping may kaugnayan sa pamamahala, pananagutan at kapakanan ng sambayanan.
Sa bahagi ng Church social teaching, ang pakikilahok ng mga mamamayan sa buhay pampubliko ay bahagi ng pagtataguyod ng common good, katarungan at responsableng pamamahala, habang ang mga usaping pampulitika ay dapat isulong sa paraang gumagalang sa dignidad ng bawat tao at sa mga institusyong demokratiko.
