980 total reads
Pangungunahan ni Pope Leo XIV ang panalangin para sa kapayapaan sa Assisi, Italy sa Oktubre 27, bilang bahagi ng paggunita sa ika-40 anibersaryo ng makasaysayang interreligious prayer meeting na sinimulan ni Saint John Paul II.
Noong Oktubre 27, 1986, unang nagtipon sa Assisi ang mga lider ng iba’t ibang relihiyon upang sama-samang manalangin para sa kapayapaan.
Mula noon, naging inspirasyon ito sa taunang pagtitipon ng Community of Sant’Egidio para isulong ang diyalogo at pagkakaisa ng iba’t ibang relihiyon.
Ngayong taon, dadalo si Pope Leo sa huling araw ng tatlong araw na pagtitipon mula Oktubre 25 hanggang 27.
Tinatayang may 384 na kinatawan mula sa 53 bansa ang inaasahang lalahok sa iba’t ibang talakayan tungkol sa kapayapaan, digmaan, migration, disarmament, kabataan, media at kalagayan ng mga mahihirap.
Makakasama rin ni Pope Leo sa natatanging panalangin para sa kapayapaan si Ecumenical Patriarch Bartholomew.
Tema ng pagtitipon ang “Disarmed and Disarming Peace,” na nagbibigay-diin sa posibilidad ng kapayapaan sa gitna ng mga digmaan at tunggalian sa mundo.
Sa pagtatapos ng pagtitipon, inaasahang maghahatid si Pope Leo ng mensahe ng kapayapaan mula sa Basilica of Saint Francis sa Assisi.
