689 total views
Pakikiisa at pakikipag-ugnayan ang mensahe ng isinasagawang Replica Procession ng Mahal na Poong Hesus Nazareno.
Ito ang ibinahagi ni Msgr. Hernando Coronel – Rector ng Minor Basilica of the Black Nazareno Quiapo Church kaugnay sa Replica Procession na isinasagawa dalawang araw bago ang Traslacion ng Mahal na Poong Hesus Nazarezo.
“Ang replika ito ay larawan, ito’y imahen ng indibidwal, yung pamilya, yung kumunidad,yung balangay kanila ito, at ngayon isinasama ito sa prosesyon ng hari sa araw na ito. So ito ay ang pakikiisa saka soliridad at pakikipag-ugnay kaya makikita natin na yung ito galing pa sila sa iba’t ibang mga lugar at saka sa iba’t ibang bahagi ng bansa, so maganda itong Replica Procession at very festive at masaya.” pahayag ni Msgr.Coronel sa panayam sa Radio Veritas.
Pagbabahagi pa ng Pari, makikita sa iba’t ibang kasuotan at ayus ng mga replika ng imahen ng Poong Hesus Nazareno ang pagiging malikhain at katangi-tanging ekspresyon ng mga mananampalatayang Filipino sa kanilang debosyon.
Gayunpaman, nilinaw ni Msgr. Coronel na dapat pa ring mangibabaw ang paggalang sa imahen na Mahal na Poong Hesus Nazareno na nagpapakita ng kalbaryo ni Hesus, ang bugtong na anak ng Diyos at Prinsipe ng kapayapaan mailigtas lamang ang sangkatauhan mula sa kasalanan.
Umaasa rin ang pamunuan ng Quiapo Church na nawa ay sa pangangalanga ng imahen ng bawat grupo o balangay ay mas makatulong rin ito sa pagpapanibago ng buhay at pagpapalalim ng pananampalataya ng bawat mananampalataya.
Batay sa tala ng Quiapo Church, umabot sa halos 1,000 replika ng imahen ng Mahal na Poong Hesus Nazareno ang nakiisa sa Replica Procession kabilang na ang 600 replica ng iba’t-ibang samahan o balangay na nagpatala sa Simbahan at higit 400 maliliit na replika ng imahen na dala ng mga deboto na nakiisa sa prosesyon na nagsimula sa Plaza Miranda pabalik ng Quiapo Church.
Ngayong taon unang inilabas at iprinosisyon ang imahen ng Mahal na Poong Hesus Nazareno ng Simbahan ng Quiapo na sinundan ng replika ng imahen mula sa iba’t ibang bahagi ng bansa.
