1,578 total reads
Inilaan ng Kanyang Kabanalan Pope Leo XIV ang kanyang prayer intention ngayong buwan ng Abril para sa mga pari na dumaraan sa krisis sa kanilang bokasyon.
Layunin ng Santo Papa na ipanalangin ang mga lingkod ng Simbahan na nahaharap sa mga pagsubok, upang kanilang matagpuan ang kinakailangang gabay at suporta mula sa kanilang pamayanan.
Binigyang-diin ni Pope Leo XIV ang kahalagahan ng malasakit at pag-unawa ng komunidad sa mga pari, lalo na sa mga panahong sila ay dumaranas ng pagdududa, panghihina, o iba pang hamon sa kanilang paglilingkod.
“Let us pray for priests going through moments of crisis in their vocation, that they may find the accompaniment they need and that communities may support them with understanding and prayer,” Panalangin ng Santo Papa para sa buwan ng Abril.
Muling ipinapaalala ng Santo Papa sa gitna ng mga hamong ito na ang bokasyon sa pagkapari ay isang biyaya na nangangailangan ng patuloy na paghubog, paggabay, at panalangin mula sa buong Simbahan.
Hinihikayat din ni Pope Leo XIV ang mga mananampalataya na maging aktibong bahagi sa pagsuporta sa kanilang mga pari, hindi lamang sa pamamagitan ng panalangin kundi maging sa pagbibigay ng pag-unawa at pakikiisa sa kanilang pinagdaraanan.
Una nang binigyang-diin ng Santo Papa na mahalagang mapanatili ang ugnayan ng mga pari sa kanilang komunidad, sapagkat dito nila matatagpuan ang lakas at inspirasyon upang magpatuloy sa kanilang misyon bilang tagapaghatid ng Mabuting Balita.
Bahagi rin ng panawagan ng Santo Papa ang pagpapaalala na ang Simbahan ay isang pamayanang nagmamalasakit, kung saan ang bawat kasapi lalo na ang mga pari ay inaalalayan sa panahon ng pagsubok.
