419 total reads
Kumikilos na ang Archdiocese of Caceres upang makapangalap ng tulong mula sa iba’t-ibang institusyon ng Simbahang Katolika para sa rehabilitasyon ng mga nasirang kabahayan dahil sa epekto ng bagyong Nina sa lalawigan ng Camarines Sur.
Ayon kay Archdiocese of Caceres Social Action Director Rev. Fr. Jeffrey Briones, nakipagpulong siya kay Caritas Manila Executive Director at Radio Veritas President Fr. Anton CT Pascual kung saan ipinahayag ng pinuno ng social arm ng Archdiocese of Manila ang intensyon na magbahagi ng P300 libong piso bilang tulong sa rehabilitation program ng kanilang arkidiyosesis.
Sinabi din ni Fr. Briones na nakikipag-ugnayan na rin sa kanila ang Catholic Relief Services para sa shelter assistance habang bukas din sila sa pakikipagtulungan sa iba’t-ibang mga non-government organization.
“Initially nagbigay sila [Caritas Manila] ng P300 thousand for rehab. Ang CRS tutulong din sa shelter sila yung mga naka-usap na naming sa bahagi ng Simbahan,”pahayag ni Fr. Briones.
Aminado ang Pari na halos lahat ng parokya sa Camarines Sur ay naapektuhan ng bagyong Nina at magpahanggang sa ngayon ay marami pang munisipalidad ang wala pa rin kuryente.
“92 Parishes ang naapektuhan, 56 Parishes nahatiran na naming ng tulong. Until now marami pang poste ang hindi naibabalik marami pang municipalities ang wala pa din kuryente,” giit ng Social Action Director ng Archdiocese of Caceres.
Sa kasalukuyan din aniya ay nagsasagawa sila ng donation drive para makalikom ng mga pako at yero na siyang magagamit upang maipagawa ang masirang kabahayan.
Umaapela si Fr. Briones sa mga nais tumulong sa kanilang programa na tinawag na “Tabang Bicol” na makipag-ugnayan lamang sa kanilang Arkidiyosesis.
Sa tala ng National Disaster Risk Reduction and Management Council o NDRRMC umabot sa mahigit 400 pamilya ang naapektuhan ng bagyo bago ang pagtatapos ng taong 2016 kung saan pinakamalaking bilang nito ay mula sa Bicol region.
