972 total reads
Mga Kapanalig, ang mga pulis ang humuhuli at kumakastigo sa mga taong nagtutulak at gumagamit ng droga. Pero paano kung mismong mga pulis ang gumagamit ng ipinagbabawal na gamot?
Noong ika-24 ng Agosto, isinagawa ang isang sorpresang drug test sa mga matataas na opisyal at miyembro ng National Capital Region Police Office (o NCRPO). Bahagi ito ng kampanya ng Philippine National Police (o PNP) na “pataasin ang integridad ng mga pulis at maiwasang masangkot sa anumang katiwalian.”
Sa halip na maisalba ang imahe ng PNP mula sa sunud-sunod na pagkakasangkot ng mga pulis sa sari-saring kontrobersya, mas napasama pa yata ito. Lumitaw na 25 pulis ang nagpositibo sa paggamit ng iligal na droga, kabilang ang shabu.2 Noong nakaraang linggo, sinibak sa puwesto ang mismong hepe ng Mandaluyong City police matapos siyang magpositibo sa isinagawang surprise drug test. Binigyan ang mga pulis na nagpositibo sa drug test ng labinlimang araw para magpaliwanag at saka sila isasailalim sa pre-charge investigation. Kasunod nito ay haharap sila sa summary dismissal proceedings kung saan matatanggal sila sa serbisyo. Sinabi ng spokesperson ng PNP na ilan sa mga nagpositibong pulis ay natanggal na sa serbisyo at may ilan namang nagkusang mag-resign.
Suwerte pa ring maituturing ang mga pulis na kumpirmadong nagpositibo sa paggamit ng iligal na droga. Ito ay dahil may pagkakataon pa silang magpaliwanag at maimbestigahan ang kanilang kaso, hindi tulad ng libu-libong biktima ng giyera kontra droga na hindi na nagawang ipagtanggol ang kanilang sarili sa harap ng batas.
Ngayong taon, namumutiktik sa kontrobersya ang hanay ng kapulisan. May mga nasangkot sa muling pagbebenta ng mga nasamsam nilang droga. May mga nasa likod ng pakanang kidnap-extortion, mga kaso ng pagpatay, at marami pang iba. Inaasahan ang mga pulis na proteksyunan at pagsilbihan ang taumbayan, ngunit paano kung sila mismo ang nasasangkot sa katiwalian at mga gawaing labag sa batas? Paano kung sila mismo ang kumikitil ng buhay? Paano natin mararamdaman ang pagkakaroon ng kaligtasan at kapayapaan kung naghahasik ng takot at nasasangkot sa anomalya ang mga may tungkuling panatilihin ang kaayusan? Malaking hamon sa PNP at sa ating gobyerno kung paano pananatilihin ang integridad ng kapulisan sa harap ng kinasasangkutan nitong mga mabibigat na isyu.
Huwag sanang dumating sa puntong tuluyang mawala ang tiwala pati na ang respeto ng mamamayan sa ating mga alagad ng batas. Gaya ng pahayag sa Mateo 2:28, maging modelo sana ng ating mga pulis si Hesus na naparito sa mundo hindi upang paglingkuran kundi upang maglingkod at magbigay ng kanyang buhay para mailigtas ang maraming tao. Maging katulad nawa sila ni Hesus na nagpakumbaba at hindi sariling kapakanan ang inisip kundi ang kapakanan ng iba. Sa ganitong paraan, magagawang malinis ng kapulisan ang kanilang imaheng nadungisan na sa dami ng kinasasangkutang kontrobersya.
Mga Kapanalig, manalig tayong marami pa rin sa hanay ng mga pulis ang may puso at paninindigang tuparin ang tunay na mandato ng PNP. Mangyayari lamang ito kung hindi hahayaan ng sistemang palipasin lang ang katiwalian at hindi panagutin ang mga tiwali. Akmang paalala ang sinabi ni Pope Francis na ang pinakadakilang paraan ng pamumuhay ay ang paglilingkod sa iba, at ang mga may kapangyarihan ay dapat makita ang kanilang mga sarili bilang mga tagapaglingkod din. Dagdag niya, ang pagkasabik sa righteousness o pagiging matuwid ay hindi nabibigo. Parati itong nagtatagumpay at laging may positibong resulta dahil tumutugma ito sa puso ng Diyos at sa Kanyang pag-ibig. Nawa’y magkaroon ng pagkasabik ang ating mga kapulisan sa katuwiran nang sa gayo’y manatili ang kredibilidad ng PNP bilang institusyon sa mata ng sambayanang kanilang pinaglilingkuran.
Sumainyo ang katotohanan.
