236 total views
Hinikayat ni Legazpi Bishop Joel Baylon ang mga mananampalataya ng Diyosesis ng Legazpi na magsuot ng puti o kaya’y magsuot ng puting laso sa pagdalo sa Banal na Misa sa Hunyo 28, 2026 bilang pagpapahayag ng panalangin at pag-asa para sa bayan.
Ito ang bahagi ng panawagan ng Obispo sa inilabas na pastoral appeal ni Bishop Baylon noong Hunyo 24, 2026 na may titulong “For Truth, Justice, and National Renewal.”
Sa kanyang mensahe, inimbitahan ni Bishop Baylon ang mga mananampalataya na suportahan ang White Ribbon Movement bilang isang faith-based at non-partisan na pagkilos para sa katotohanan, katarungan, at pambansang pagpapanibago.
“On Sunday, June 28, let us gather for the Sunday Mass, where the Lord renews our hearts and strengthens us to become instruments of truths, justice, peace, and charity. As a simple expression of our hope for our country, I encourage everyone to wear white when attending Mass or to wear a white ribbon.” Bahagi ng mensahe ni Bishop Baylon.
Hinimok din ng Obispo ang mga pamilya, paaralan, tanggapan, negosyo, institusyon, at mga parokya na maglagay ng puting laso bilang tanda na ang tunay na pagbabago ay nagmumula sa bawat isa sa lipunan.
Pinaalalahanan din ni Bishop Baylon ang mga Katoliko na hindi dapat matapos sa isang araw lamang ang kanilang pagsasabuhay ng pananampalataya at pagiging mabuting mamamayan sa halip ay dapat na isabuhay sa pang-araw-araw.
Ayon sa obispo, “Our witness, however, must not end on this day only. It must become a way of life! As followers of Christ, let us continue to seek the truth, reject misinformation, resist every form of corruption, and exercise prudent discernment in all that we hear, share, and do.”
Kasabay ng paghahanda ng Diyosesis ng Legazpi para sa pagdiriwang ng Diamond Jubilee nito, nanawagan din si Bishop Baylon sa mga mananampalataya na muling pagtibayin ang kanilang pangako sa pagtataguyod ng isang lipunang nakabatay sa katarungan, malasakit, at pag-asa.
