331 total views
Inihahanda na ng Diocese of Borongan ang tulong sa mga pamilya na naapektuhan ng pagbaha sa lalawigan ng Eastern Samar.
Ayon kay Borongan Bishop Crispin Varquez, hinahanda na ng kanilang Social Action Center ang pagpapadala ng may 500 sako ng bigas at iba pang mga relief items para sa mga sinalanta ng pagbaha dahil sa ilang araw na pag-ulan sa lalawigan.
Hinikayat rin ni Bishop Varquez ang local na pamahalaan na agad tugunan ang pangangailangan ng mga apektadong pamilya lalo na’t nalalapit na ang araw ng Pasko.
Umapela din ng pagdarasal ang Obispo para sa mga naapektuhan ng pagbaha at masamang panahon.
“We pray for the people who are affected of flooding hopefully we can respond locally para matulungan sila lalo na at magpapasko,” pahayag ni Bishop Varquez sa panayam, ng Radio Veritas.
Kaugnay nito, inihayag ng OCD-Region 8 na umabot na sa mahigit 31 libong pamilya ang apektado ng pagbaha sa iba’t-ibang bahagi ng Eastern Visayas.
Kasalukuyan namang binabantayan ng PAGASA ang isang bagyo na nasa silangan bahagi ng bansa.
Posible itong pumasok sa Philippine Area of Responsibility ngayong gabi o bukas at tatawaging bagyong Nina, ang ika-14 na bagyo sa bansa ngayong taong 2016.
